Qonys aýdarýshylardy jumyspen qamtyǵandarǵa qansha tólenedi
PETROPAVL. QazAqparat - Soltústik Qazaqstan oblysynda bolǵan jınalysta QR Eńbek jáne áleýmettik qorǵaý mınıstri Madına Ábilqasymova jergilikti atqarýshy organdardyń nazaryn qonys aýdarýshylardyń jumyspen qamtylýyna aýdardy, dep habarlaıdy «QazAqparat» HAA tilshisi.
Madına Ábilqasymova óńirdegi nátıjeli jumyspen qamtý jáne jappaı kásipkerlikti damytý baǵdarlamasynyń júzege asyrylýyna oń baǵa berdi. Byltyr Soltústik Qazaqstan oblysynda 19 myń adam jumysqa tartylyp, sonyń 13 myńy turaqty jumys oryndaryna ornalastyryldy.
«Qonys aýdarýshylardyń jartysynan azy jumyspen qamtylǵan. Osy baǵytta azamattardy oqytý, qaıta daıarlaý boıynsha jumys isteý kerek. Óńirde jumys kúshi jetkiliksiz. Osyǵan baılanysty basqa oblystardan olardy tartý jumystaryn jalǵastyrý qajet», - dedi M.Ábilqasymova.
Sondaı-aq, ol kem degende 5 qonys aýdarýshyny jumysqa qabyldaǵan jumys berýshilerge ár jumysshy úshin 450 AEK kóleminde sýbsıdııa beriletindigin atap ótti.
«Bul tetik eldegi óńirlerdiń qyzyǵýshylyǵyn arttyrdy. Osyny nasıhattap, oblysta júzege asyrý kerek. Budan bólek jańa bıznes-ıedıalardy iske asyrý úshin100 AEK kóleminde qaıtarymsyz granttar usyný qarastyrylǵan», - dep atap ótti mınıstr.
Oblys ákiminiń orynbasary Ashat Sákipkereevtiń aqparaty boıynsha, qonys aýdarýshylardy ornalastyrý kartasy jasalǵan. Oǵan 224 eldi meken kirgen. Kóship kelýshilerge óńirdegi bos jumys oryndary, mamandyqtar anyqtalǵan.
«Bizdiń delegatsııamyz qazir Mańǵystaý, Almaty, Jambyl oblystarynda jumys istep jatyr. Jyl basynan beri 18 otbasy qonys aýdardy», - dedi A. Sákipkereev.
Óńirge bıyl barlyǵy 3,4 myń adam keledi.
