Konvert daýy: Aqtóbede tekserýdiń alǵashqy nátıjesi belgili boldy
AQTÓBE. KAZINFORM – Áleýmettik jelide «Aqtóbe» ÁKK» AQ basqarma tóraǵasynyń birinshi orynbasary Rýslan Ájnııazov konvert berip, oblys ákiminiń orynbasary Ǵalymjan Eleýovtiń kómekshisi degen adamnyń ony alyp jatqan vıdeosy tarap, tekserý júrdi. Ázirge nátıjesi tolyq daıyn emes.
«Aqtóbe» ÁKK» AQ-ykonvert daýyna qatysty tekserý júrgizdi. Alaıda áli kúnge deıin tuşymdy jaýaby joq.
— Osy fakti boıynsha aktsıonerlik qoǵamnyń komplaens-qyzmetimen qyzmettik tekserý júrgizilgenin habarlaımyz. Tekserý aıasynda qyzmetkerlerden túsiniktemeler alyndy. Quzyret sheginde barlyq mán-jaılar zerdelendi. Osy tekserý nátıjeleri boıynsha barlyq syıaqy eńbek zańnamasy aıasynda berilgeni anyqtaldy. Buryn áleýmettik jelilerde jarııalanǵan aqparat rastalǵan joq, ıaǵnı shyndyqqa janaspaıdy. Sonymen qatar, tekserýlerdi basqa da memlekettik organdar júrgizip jatqanyn habarlaımyz. Onyń nátıjeleri týraly qosymsha aıtylady, — dedi «Aqtóbe» ÁKK» AQ Basqarma tóraǵasynyń orynbasary Narek Gegamıan.
Eske salsaq, oblys ákiminiń orynbasary Ǵalymjan Eleýovtiń kómekshisi degen adamnyń buǵan deıin ákimdikte qyzmet ekeni anyqtaldy. Ákim orynbasary bul jaǵdaıǵa qatysty qandaı da bir túsinik bermedi.
