Konvert daýy: Aqtóbede qyzmettik tekserý júrip jatyr
AQTÓBE. KAZINFORM – Áleýmettik jelide «Aqtóbe» ÁKK» AQ basqarma tóraǵasynyń birinshi orynbasary Rýslan Ájnııazov konvert berip, oblys ákiminiń orynbasary Ǵalymjan Eleýovtiń kómekshisi degen adamnyń ony alyp jatqan vıdeosy tarap ketti. Qazir osy oqıǵaǵa baılanysty qyzmettik tekserý júrip jatyr.
Vıdeodan «Aqtóbe» ÁKK» AQ basqarma tóraǵasynyń birinshi orynbasary Rýslan Ájnııazovtiń konvert sekildi zatty berip jatqany, al Ǵalymjan Eleýovtiń kómekshisi dep jazylǵan adamnyń ony alyp, qoınyna jasyrǵanyn kórýge bolady.
Qazirgi kezde «Aqtóbe» ÁKK» AQ-da qyzmettik tekserý bastaldy.
- Vıdeo áleýmettik jelige tarap ketti. Biz de kórdik. Qazirgi kezde qyzmettik tekserý bastaldy. Barlyǵy jan-jaqty tekserilgen soń qorytyndysyn habarlaımyz. Vıdeodaǵy adam - «Aqtóbe» ÁKK» AQ basqarma tóraǵasynyń birinshi orynbasary Rýslan Ájnııazov. Sonymen birge ol jerde oblys ákiminiń orynbasary Ǵalymjan Eleýovtiń kómekshisi dep jazylǵan. Turaqtandyrý qory men turǵyn úı-kommýnaldyq sharýashylyqty jańǵyrtýǵa jaýapty Rýslan Ájnııazov qazir jınalysta. Bul jerde qyzmette júrgenine eki aı boldy. Tekserýdi «Aqtóbe» ÁKK» AQ-nyń kadr bólimi júrgizedi, - dedi «Aqtóbe» ÁKK» AQ basqarma tóraǵasynyń orynbasary Narek Gegamıan.
Ol qyzmetkerlerdiń syıaqysy qansha ekenin bilmeıdi, biraq jyl sońynda syıaqy berilgenin jasyrmady. «Aqtóbe» ÁKK» AQ-da barlyǵy 80 adam eńbek etedi.
Mán-jaıdy Aqtóbe oblysynyń ákimdigi de túsindirdi.
- Aqtóbe oblysy ákiminiń orynbasary Ǵalymjan Eleýovtiń qatysy bar ma, joq pa, ol jaǵyn bilmeımiz. Qazir ishki tekserý jumysy júrip jatyr. Sol kezde anyqtalady. Sodan keıin ǵana sheshimin habarlaımyz. Vıdeodaǵynyń biri «Aqtóbe» ÁKK» AQ-y basqarma tóraǵasynyń birinshi orynbasary Rýslan Ájnııazov, ekinshisi buryn oblys ákimdiginde jumys istegen. Biz ony ara-tura kóretinbiz, biraq ákimdikte qyzmetker emes. Al Aqtóbe oblysy ákiminiń orynbasary Ǵalymjan Eleýov jumysta, jınalysta, - dedi Aqtóbe oblysy ákiminiń baspasóz hatshysy Gúlbaǵda Kóbeeva.
Aıta keteıik, qyzmettik tekserý nátıjesi 10 kún ishinde shyǵarylady.
Posmotret etý pýblıkatsııý v Instagram
