Konventsııa paıdalanylǵan otynmen jáne radıoaktıvti qaldyqtarmen jumys isteý qaýipsizdigin qarastyrady
ASTANA. Qańtardyń 6-sy. QazAqparat - Paıdalanylǵan otynmen jumys isteý qaýipsizdigi týraly jáne radıoaktıvti qaldyqtarmen jumys isteý qaýipsizdigi týraly birikken konventsııany bekitýdi kózdegen zań jobasy Májiliske kelip tústi,
dep habarlaıdy QazAqparat.
1997 jyly qyrkúıek aıynda qol qoıylǵan Konventsııany Úkimet depýtattardyń qaraýyna zań jobasy túrinde usynyp otyr. Búgin ótken Májilis Bıýrosynyń otyrysynda ol Palatanyń jalpy otyrysynyń kún tártibine usynyldy.
Konventsııanyń negizgi maqsaty ulttyq sharalardy jáne halyqaralyq yntymaqtastyqty, onyń ishinde tıisti jaǵdaılarda qaýipsizdik salasyndaǵy tehnıkalyq yntymaqtastyqty nyǵaıtý jolymen búkil álemde paıdalanylǵan otynmen jáne radıoaktıvti qaldyqtarmen jumys isteý qaýipsizdiginiń joǵary deńgeıine qol jetkizý jáne ony qoldaý bolyp tabylady.
Úkimettiń bergen túsindirmesine súıensek, osy Konventsııany ratıfıkatsııalaý Qazaqstannyń paıdalanylǵan otynmen jáne radıoaktıvti qaldyqtarmen jumys isteýdiń halyqarlyq standarttarǵa sáıkes qaýipsiz júıesin jasaý nıetin aıǵaqtaıdy. Sol arqyly Qazaqstannyń atom energııasyn beıbit maqsatta paıdalaný salasyndaǵy halyqaralyq yntymaqtastyǵyn odan ári damytýǵa yqpal etetin bolady.
Memleket basshysy Nursultan Nazarbaevtyń tapsyrmalaryn oryndaý úshin Qazaqstan Respýblıkasy Energetıka jáne mıneraldyq resýrstar mınıstrligi Kanadamen, Frantsııamen, Japonııamen jáne Úndistanmen atom energııasyn beıbit maqsatta paıdalaný salasyndaǵy úkimetaralyq kelisimderge qol qoıýǵa ázirlik jumystaryn júrgizýde.
