Kontrtsıkldik fıskaldyq saıasat memlekettik qarjynyń turaqtylyǵyn nyǵaıtady - Jumanǵarın
ASTANA. KAZINFORM – Kontrtsıkldik fıskaldyq saıasat mańyzdy dezınflıatsııalyq faktorǵa jáne memlekettik qarjynyń turaqtylyǵyn nyǵaıtý faktoryna aınalady. Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Kontrtsıkldik fıskaldyq saıasat mańyzdy dezınflıatsııalyq faktorǵa jáne memlekettik qarjynyń turaqtylyǵyn nyǵaıtý faktoryna aınalady. Ol úshin Ulttyq qordan beriletin transfertter jáne bıýdjet shyǵystarynyń ósýi boıynsha bıýdjettik qaǵıdalardyń saqtalýy qamtamasyz etiledi. Bıýdjet tapshylyǵyn 2028 jyly jalpy ishki ónimge 0,9 paıyzǵa deıin, al munaıǵa qatysty emes tapshylyqty jalpy ishki ónimge 2,7 paıyzǵa deıin qysqartý josparlanyp otyr, - dedi vıtse-premer.
Onyń aıtýynsha, memlekettik qaryz jalpy ishki ónimge 26 paıyzdan aspaıtyn turaqty deńgeıde saqtalatyn bolady.
- Eldiń egemendi kredıttik reıtıngin arttyrý, onyń ishinde memlekettik baǵaly qaǵazdardy syrtqy naryqtarǵa turaqty ornalastyrý arqyly arttyrý jónindegi jumys jalǵasatyn bolady. Valıýtalyq aktıvter men mindettemelerdiń araqatynasyn eskere otyryp, Úkimet syrtqy netto-kredıtor bolyp qala beredi, - dedi ol.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.