Kontrafaktilik ónimder sórelerde əli tur - «Rodına AF» basshysy Ivan Saýer
ASTANA. QazAqparat - Ońtústikten, batystan, shyǵystan jetkiziletin taýarlarǵa qatysty deldaldardyń zalaly tıip otyr. Bul týraly Senatta Astana mańyndaǵy azyq-túlik beldeýi taqyrybyna arnalǵan dóńgelek ústel otyrysynda «Rodına AF» JShS-niń bas dırektory Ivan Saýer málim etti, dep habarlaıdy QazAqparat.
Onyń sózine qaraǵanda, Astanada azyq-túlik qajettilikterine qatysty kórsetkishterdi esepteý men tirkeýdi retke keltirip, statıstıka boıynsha naqty túsinikter kerek. Sebebi tutynylatyn jáne jetkiziletin ónim kólemine qatysty sáıkes kelmeıtin málimetterdi naqtylaý qajet.
Budan bólek ol deldaldar máselesine toqtaldy.
«Qarjylyq shyǵyndardy qajet etpeıtin máselege nazar aýdarǵym keledi. Osy oraıda deldaldarǵa qatysty jaǵdaıdy baıaǵyda sheshý qajet edi. Ónimniń barlyq túrleri boıynsha mundaı másele bar, ıaǵnı keıbir salada deldaldardyń ústemesi kóbirek bolsa, al birqatar baǵyttarda olardyń ústemesi azyraq. Ásirese, ońtústikten, batystan, shyǵystan jetkiziletin taýarlar boıynsha deldaldardyń zalaly tıip otyr. Osy rette logıstıkany jeleý etip, aıtarlyqtaı úlken ústeme qosý jaǵdaıy baıqalady. Tek almanyń ózi 3 esege deıin qymbattaıdy. Sondyqtan da bul máseleni sheshý kerek jáne oǵan qosymsha shyǵyndardyń qajeti joq», - dedi I. Saýer.
Budan bólek ol ónimniń sapasyna toqtala kele, sút pen maıdyń kontrafaktisi problemasy týraly kópten beri aıtylyp kele jatqanyn jetkizdi.
I. Saýerdiń sózinshe, tekserýler barysynda kontrafaktilik ónimder anyqtalyp jatyr, degenmen de bundaı ónimder dúken sórelerinde áli de baıqalýda.
«Osy máselede jaýapkershilikti kúsheıtip, zańsyzdyqqa barǵandardy jazalaýǵa kirisý kerek. Óıtkeni mundaı qadamdar jasamasaq, tártipke keltirý qıynǵa túsedi. Sonymen qatar bizde densaýlyq saqtaý salasynda aýqymdy baǵdarlama iske asyrylyp jatyr. Biraq azyq-túlikti jetkizýshi keıbireýler adamdardyń densaýlyǵyna zııan keltirýi saldarynan, atalǵan baǵdarlamanyń nátıjesine jetýge aıtarlyqtaı kedergi bolatyny anyq. Sondyqtan elimizdiń aýmaǵyna sapasyz ónimderdi kirgizýge qatań tosqaýyl qoıǵan durys bolar edi», -dedi ol.
