Kontrafakt ónimderin satqan qylmyskerlerge úkim shyǵaryldy
ASTANA. 13 shilde. QazAqparat. Kez-kelgen qylmys qoǵamdyq qaýipti áreket bolyp tabylady. Astana qalasynyń Saryarqa aýdandyq soty kontrafakt ónimdi óndirý men satýdy jolǵa qoıǵan qylmyskerlerge qatysty aıyptaý úkimin shyǵardy.
Ótken jyldyń sońynda jedel-izdeý is-sharalary kezinde «baqylaý satyp alý» júrgizilip, nátıjesinde kontrafakt ónimderin satý faktisi, dálirek aıtqanda, K. Ormanov pen T. Óskembaevtyń kontrafakt DVD-dıskter jasap, olardyń árbir birligin 250 teńgeden satqany anyqtalyp, kontrafakt belgileri bar 102 DVD-dısk alyndy.
2011 jyldyń 12 qańtarynda jedel-izdeý is-sharalary barysynda Astana qalasy boıynsha ekonomıkalyq jáne sybaılas jemqorlyqqa qarsy kúres departamenti kontrafakt ónimderi óndiriletin tsehty, ónimderdi saqtaý qoımasy men ony Astana qalasynyń aýmaǵynda ótkizetin oryndardy anyqtaǵan.
K. Ormanov jaldamaly páterde ornalasqan kontrafakt ónimder óndiriletin astyrtyn tsehtyń uıymdastyrýshysy bola turyp, Ózbekstan Respýblıkasynyń azamaty T. Óskembaevpen aldyn-ala kelisý arqyly kontrafakt ónimderin ázirlep, ótkizýmen aınalysqan. Ormanov pen Óskembaev ázirlengen kontrafakt ónimderdiń ár birligin 250 teńgege satý úshin ótkizý oryndaryna tasymaldaǵan.
Tsehty, qoımany jáne ótkizý oryndaryn qaraý barsynda túrli vıdeofılmder jazylǵan kontrafakt 3842 dana DVD dıskt tabylyp, alyndy. Sarapshynyń qorytyndysyna sáıkes alynǵan DVD dıskter lıtsenzııaly ónimge jatpaıdy.
Osy qylmystyq is boıynsha sot tergeý jumystary kezinde Ormanov pen Óskembaev Qazaqstan Respýblıkasy Qylmystyq kodeksiniń 184-babynyń 3-bóligi «a,b,v» tarmaqtary boıynsha jasaǵan qylmystaryn tolyq moıyndap, shynaıy ókinetindikterin bildirdi.
Sot úkimimen K. Ormanov pen T.Óskembaev avtorlyq quqyq obektisiniń kontrafakt danalaryn zańsyz ázirlegeni úshin Qylmystyq kodekstiń 184-babynyń 3-bóligi «a,b,v» tarmaqtary boıynsha 3 jylǵa bas bostandyǵynan aıyryldy, olarǵa shartty túrde synaq merzimimen 2 jyl bas bostandyǵynan aıyrylý taǵaıyndaldy.
