Kontrabandısterden tárkilengen taýarlar turǵyndarǵa taratylady - Jambyl
TARAZ. QazAqparat – Oblystyq ekonomıkalyq tergeý departamenti kontrabandashylardan tárkilegen tutyný taýarlaryn óńirdegi muqtaj jáne az qamtylǵan turǵyndarǵa taratady, dep habarlaıdy QazAqparat oblys ákimdiginiń resmı saıtyna silteme jasap.
Tárkilengen taýarlardyń ishinde 546 mıllıon teńgeniń 530 túrli ataýly kıimi, tósek-oryn jabdyqtary jáne basqa da taýarlar bar. Búginde olardy úlestirý boıynsha adamdardyń sanattary anyqtalǵan.
«Eń aldymen, áleýmettik mekemeler – balalar úıleri, qarttar úıleri, psıhonevrologııalyq jáne ózge de aýrýlarmen aýyratyndarǵa arnalǵan ınternat úılerindegi qyzmet alýshylar irikteldi. Sonymen qatar, bul tizimge oblystaǵy az qamtylǵan azamattar men AÁK alýshylar, sondaı-aq ómirlik qıyn jaǵdaıǵa tap bolǵan turǵyndary da engizilgen», - deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov.
Sondaı-aq, Taraz qalasy men aýdandarda bul kómekke muqtaj adamdardyń tizimi ázirlengen. Az qamtylǵan halyq arasynda taýarlardyń bólinýin baqylaý tikeleı jergilikti ákimderge júktelip otyr. Olar osy iste qandaıda bir buzýshylyqtarǵa jol berilmeýine jaýapty bolady.
Salalyq basqarma taýarlardy Taraz qalasy men aýdandarda jumys isteıtin áleýmettik dúkenderi arqyly taratýǵa nıetti. Jastar basqarmasy qazirdiń ózinde 109 myń dana taýarǵa ótinim bergen.
Aıta ketý kerek, tárkilengen taýarlardyń bir bóligi – 10 myń jańa taýar 3 mamyr kúni azyq-túliktermen birge sý tasqynynan zardap shekken kórshiles Túrkistan oblysyna jiberilgen.
