Kontrabandashylar ózbek-qyrǵyz shekarasynda 3 jerasty jolyn qazyp alǵan
TAShKENT. QazAqparat – Ózbekstannyń arnaıy qyzmeti jasyryn jerasty tonnelderi arqyly kórshiles Qyrǵyzstanda kontrabandamen aınalysatyn uıymdasqan qylmystyq toptyń (UQT) jolyn kesti. Olar Ózbekstannan Qyrǵyzstanǵa 1,6 mln AQSh dollarynan astam qarjyny zańsyz alyp ótpek bolǵan kezinde ustaldy, dep habarlaıdy QazAqparat menshikti tilshisi.
Ózbekstan memlekettik qaýipsizdik qyzmetiniń málimetinshe, eki ózbek jáne alty qyrǵyz azamatynan quralǵan transshekaralyq UQT-ny 1974 jylǵy Qyrǵyzstan týmasy basqarǵan. Olar Qyrǵyzstanǵa aparatyn jerasty tonnelderin qazyp, sol arqyly shetel valıýtasy men taýarlyq-materıaldyq zattardy zańsyz alyp ótýdi uıymdastyrǵan.
Uzyndyǵy 150 metr bolatyn birinshi tonnel Andıjan oblysy Qorǵantepin aýdanynyń 32 jastaǵy turǵynynyń úıinen tabyldy. Sodan keıin quqyq qorǵaý organdarynyń qyzmetkerleri taǵy bir úıdi qarap, onda da Qyrǵyzstanǵa aparatyn tonneldi anyqtaǵan. Onyń tereńdigi – 10-12 m, uzyndyǵy – 420 m.
Tergeý kezinde taǵy bir jerasty joly tabyldy. Qarasý qalasynyń turǵyny Qyrǵyzstan azamattarymen sóz baılasyp, ózbek-qyrǵyz memlekettik shekarasyn bólip turǵan «Shahrıhansaı» kanalynyń astynan tereńdigi shamamen 16 m jáne uzyndyǵy 70 m bolatyn ótkel qazǵan. Oǵan elektr jaryǵyn tartyp, ottegin beretin jabdyqtar da ornatqan.
«Osy úsh jerasty jolymen Ózbekstannan kórshi memleketke asa kóp mólsherde shetel valıýtasy shyǵarylǵan, elimizge túrli taýarlyq-materıaldyq zattar ákelingen. Qylmystyq topqa qatysty is qozǵaldy. Sot qylmyskerlerdi 6 jyldan 8 jylǵa deıin bas bostandyǵynan aıyrdy», - dep habarlady Ózbekstannyń memlekettik qaýipsizdik qyzmetinen.
