Kontrabandamen kúreste qatań sharalar qajet - Senat tóraǵasy

NUR-SULTAN. QazAqparat - Senat tóraǵasy Máýlen Áshimbaev qyzdyrylatyn temeki ónimderine aktsızderdi engizý máselesine qatysty pikir bildirdi, dep habarlaıdy QazAqparat tilshisi.

«Bul máselede josyqsyz kásipkerlerdiń qyzdyrylatyn temeki ónimderin kontrabandalyq jolmen ákelýiniń aldyn alý asa mańyzdy. Áıtpese, Ulttyq ekonomıka mınıstrligi usynǵan is-sharalar nátıje bermeıdi. Sondyqtan aktsızderdi kóterý saıasatymen qatar kontrabandaǵa qarsy kúres boıynsha qatań sharalar da qolǵa alynýy kerek», – dedi Máýlen Áshimbaev Senattyń jalpy otyrysynda.

Onyń aıtýynsha, naqty nátıjege qol jetkizý úshin aktsızderdi arttyryp qana qoımaı, kontrabandamen de tıimdi kúresý qajet.

Budan buryn habarlanǵandaı, Ulttyq ekonomıka mınıstri Álibek Qýantyrov temekige aktsız kezeń-kezeńimen kóteriletinin aıtty.