Kontrabandamen aınalysatyn uıymdasqan qylmystyq topty búrkemelegen kedenshi quryqtaldy

ASTANA. 26 qarasha. QazAqparat - Aqtóbe oblysy Kedendik baqylaý departamentiniń «Energetıkalyq» keden beketiniń bas mamany Qonaevqa qatysty qylmystyq is qozǵaldy, dep habarlady elimizdiń qarjy polıtsııasynan.

Esterińizge sala keteıik, Qarjy polıtsııasy agenttigi men Atyraý, Aqtóbe jáne Batys Qazaqstan oblystarynyń departamentteriniń qyzmetkerleri kólemdi operatsııa nátıjesinde 2012-2013 jyldary munaıdyń zańsyz aınalymy salasynda qyzmet etken qylmystyq topty áshkerelegendigin buǵan deıin de habarlaǵan bolatyn. Atalǵan ýaqyt ishinde Qazaqstannyń 8 azamaty men Moldova Respýblıkasynyń 2 azamatynan turatyn top Aqtóbe oblysynda munaıdyń ken oryndarynan jalpy kólemi 739 tonna munaıdy urlaǵan. Qylmystyq toptyń basshysy Kamalýtdınov jáne onyń sybaılasy Іzimov tutqyndalǵanǵa deıin qarjy polıtsııasynyń qyzmetkerlerine para berý arqyly qylmystyq toptyń jumysyn tekserýdi toqtatýǵa áreket jasaǵan. Olarǵa qatysty tekseristi toqtatý úshin 755 myń teńge somasynda Atyraý oblysynyń qarjy polıtsııasy qyzmetkerlerine para berý, 630 myń teńge somasynda Aqtóbe oblysynyń qarjy polıtsııasy qyzmetkerlerine para berý faktileri boıynsha qylmystyq ister qozǵaldy. Sonymen qatar 4 qarashada atalǵan toptyń belsendi múshesi Іzimovqa qatysty terrorızm jáne ekstremızmdi nasıhattaý faktisi boıynsha qylmystyq is qozǵalǵan edi. Ol 2012 jyldyń qarasha-jeltoqsan aılarynda, dástúrli emes dinı aǵymdy qoldaýshy retinde esepte tursa da, terrorızmdi aqtaıtyn ıdeıalar men kózqarastardy aýyzsha túrde taratqan. 2013 jylǵy 20 qarashada Aqtóbe oblysy Kedendik baqylaý departamentiniń «Energetıkalyq» keden beketiniń bas mamany Qonaevqa qatysty qylmystyq is qozǵaldy. Ol qylmystyq top múddesine jumys isteı kele, 1200 AQSh dollary zańsyz syıaqy úshin, zerthanaǵa tekserýge munaı úlgileriniń ornyna mazýtty jiberip, munaıdyń mazýt túrinde kontrabandalyq jolmen ketýine septigin tıgizgen. Qonaev ta, uıymdasqan qylmystyq toptyń basqa da músheleri qamaýǵa alyndy.