Kontrabandalyq taýardyń jartysynan kóbi temir jolmen tasymaldanady

ASTANA. QazAqparat - Bas kólik prokýratýrasy Qarjy mınıstrliginiń Memlekettik kirister komıteti basshylarynyń qatysýymen ekonomıkalyq kontrabandaǵa qarsy is-qımyl máseleleri boıynsha alqa otyrysyn ótkizdi. Bul týraly QazAqparat Bas kólik prokýratýrasynyń baspasóz qyzmetine silteme jasap habarlaıdy.

Іs-sharada atalǵan saladaǵy zańdylyqtyń jaı-kúıi, sonyń ishinde kontrabandalyq jolmen taýarlardyń kirý arnalaryn anyqtaý jáne jolyn kesý boıynsha júrgizilip jatqan jumystar, osy sanattaǵy qylmystyq isterdiń tergelý sapasy jáne basqa da problemalyq máseleler talqylandy.

Bul máseleler kólik prokýratýrasynyń alańynda alǵash ret qaraldy, sebebi kedendik saladaǵy barlyq qylmystyq ister boıynsha qadaǵalaý aǵymdaǵy jyldyń aqpan aıynan bastap kólik prokýrorlaryna júktelgen edi.

Qylmystylyqtyń taldaýy ótken jylmen salystyrǵanda ekonomıkalyq kontrabanda boıynsha qylmystyq ister sanynyń 13,3%, ıaǵnı 52-den 67-ge deıin óskenin kórsetti.

Kontrabandalyq taýardyń jartysynan kóbi temir jol kóligimen tasymaldanady. Ol 76% quraıdy, al qalǵan 24% avtomobıl kóligimen jetkiziledi.

Osy kezeńde kólik prokýrorlary 54 protsessýaldyq sheshimniń kúshin joıyp, 2 isti qosymsha tergeýge qaıtardy.

Oǵan áreketti durys saralamaýmen, dáleldemelerdi anyqtaý jáne bekitý kezinde qylmystyq is júrgizý zańnamasynyń normalaryn buzýmen, kásipkerlik sýbektilerin qylmystyq qýdalaý aıasyna negizsiz tartýmen ushtasqan sotqa deıingi tergep-tekserý jumystarynyń sapasyz júrgizý, sondaı-aq isti sheshý úshin mańyzy bar qujattardy burmalaý derekteri negiz boldy.

Otyrys barysynda kontrabanda zattarynyń saqtalýyna jáne memleket kirisine ýaqytyly aınalýyna basty nazar aýdaryldy.

Otyrys qorytyndysy boıynsha memlekettik organ basshylaryna ekonomıkalyq kontrabandaǵa qatysty jumysty kúsheıtý, qylmystyq isterdi tergeý sapasyn arttyrý júkteldi. Sonymen qatar azamattardy qylmystyq qýdalaý aıasyna negizsiz tartylýyna, óz qatarlarynda sybaılas jemqorlyq kórinisterine jol bermeý tapsyryldy.