Kontrabandalyq jolmen taýar tasyp, memleketke 10 mlrd teńge zalal keltirgender ustaldy

ASTANA. KAZINFORM – Almaty qalasynda Qytaıdan Qazaqstanǵa, halyq tutynatyn taýarlardy kontrabandalyq jolmen ákelý jáne asa iri mólsherde jalǵan shot-faktýralar jazý deregi boıynsha qylmystyq iske aıyptaý úkimi shyǵaryldy.

Qylmystyq isti Qarjylyq monıtorıng agenttiginiń Almaty qalasy boıynsha departamenti tergedi. Tergeý barysynda «Group of the Companies TDA» JShS ýákiletti ekonomıkalyq operator mártebesine ıe bola tura, Qytaıdan 100-den astam konteınerdi zańsyz jolmen elimizge kirgizgeni anyqtaldy. Sonymen qatar olardyń baqylaýyndaǵy 10 jaýapkershiligi shekteýli seriktestik arqyly jalǵan shot-faktýralar jazylǵan.

Qarjylyq monıtorıng agenttigi málimetinshe, memleketke keltirilgen zalal (qosylǵan qun salyǵy, korporatıvtik tabys salyǵy jáne kedendik tólem boıynsha) 10 mlrd teńge boldy.

Sotqa deıingi tergep-tekserý barysynda memleket bıýdjetine 643 mln teńge óndirip alyndy.

Sot sanktsııasymen: jalpy quny 1,3 mlrd teńge bolatyn taýarlarǵa, kúdiktilerge tıesili 300 mln teńge somasyndaǵy múlikke (jer telimderi, avtokólikter, baggı kólikteri, jyljymaly shatyrlar jáne t.b.) shekteý qoıyldy. Buǵan qosa, atalǵan kompanııamen baılanysta bolǵan 47 seriktes kásiporyn óz erkimen ózara esep aıyrysýdy toqtatyp, bıýdjetke 240 mln teńge salyq tólegen. Almaty qalasynyń Almaly aýdandyq sotynyń úkimimen kináli tulǵalar múlkin tárkileı otyryp, 1 jyl 4 aıdan 4 jyl 6 aıǵa deıin bas bostandyǵynan aıyrý jazasyn taǵaıyndady.

Sonymen qatar iske qatysy bar bir adamǵa halyqaralyq izdeý jarııalandy.

Aıta keteıik, Qytaı strategııalyq paıdaly qazbalar kontrabandasymen kúresti kúsheıtedi.