Konteınerlik tasymal baǵdarlamasy, Smart Cargo, áýemen júk tasymaldaý operatoryn qurý — Kólikmınge jańa mindetter júkteldi

ASTANA. KAZINFORM — Premer-mınıstr Oljas Bektenov Kólik mınıstrligine eki aı ishinde konteınerlik tasymaldy yntalandyrý baǵdarlamasyn ázirlep, kedendik jáne logıstıkalyq qyzmetterdiń biryńǵaı tsıfrlyq júıesin iske qosý týraly tapsyrma berdi. 

— Elimizdiń tranzıttik áleýetin keńeıtý, sondaı-aq ishki kólik jelisin damytý úshin aıtarlyqtaı rezervter bar. Osyǵan baılanysty Kólik mınıstrligi «Baqty — Aıagóz», «Qyzyljar — Moıynty», «Darbaza — Maqtaaral», sondaı-aq avtojoldardy salý jáne jóndeý jobalarynyń ýaqtyly iske asyrylýyn qamtamasyz etsin. Qytaıdan Eýropaǵa deıingi tranzıtti edáýir qysqartatyn «Sekseýil — Beıneý» jobasyna erekshe nazar aýdarǵan jón. Sondaı-aq Kólik mınıstrligi eki aıdyń ishinde konteınerlik tasymaldy yntalandyrýdy jáne mýltımodaldy baǵyttardy damytýdy kózdeıtin arnaıy baǵdarlamany Úkimetke engizsin, — dedi ol Úkimet otyrysynda.

Sondaı-aq Bektenov kedendik jáne logıstıkalyq qyzmetterdiń biryńǵaı tsıfrlyq júıesin iske qosýdy tapsyrdy.

— Kólik mınıstrligi Ulttyq ekonomıka mınıstrligimen birlesip, kóliktiń barlyq túri úshin básekege qabiletti jańa tarıf saıasatyn ázirleýge kirisýi kerek. Kólik mınıstrligi Qarjy jáne Tsıfrlandyrý mınıstrlikterimen birlesip, qazan aıynyń sońyna deıin «Smart Cargo» — kedendik jáne logıstıkalyq qyzmetterdiń biryńǵaı tsıfrlyq júıesin iske qosýdy qamtamasyz etýge tıis, — dedi Úkimet basshysy.

Odan bólek, júkti áýemen tasymaldaý salasyna qatysty da naqty mindetter júkteldi.

— Taǵy bir mańyzdy másele — júkti áýemen tasymaldaý salasyn damytý. Ol úshin iri sheteldik seriktesterdi tarta otyryp, Ulttyq júk tasymaldaýshyny qurý qajet. Kólik mınıstrligi aerohabtardy damytý, sondaı-aq ekspress-júk tasymaly segmentin retteý boıynsha qajetti sharalardy qabyldasyn. Sonymen qatar júkter men sálemdemelerdi jetkizýge arnalǵan arnaıy avtokólikter men drondar sııaqty júrgizýshisiz kólik túrlerin jedel engizý úshin jaǵdaı jasap, zańnamalyq turǵydan sharalar qabyldaǵan jón, — dedi Oljas Bektenov.

Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.

Sondaı-aq Tsıfrlyq damý mınıstrligi shuǵyl atqarýy tıis mindetterdi ataǵan edi.