Konteınerlik poıyzdardyń trazıttik deklaratsııalaryn rásimdeý 30 mınýtqa qysqardy
ASTANA. KAZINFORM – Kedendik ákimshilendirýdi tsıfrlandyrýda biryńǵaı Keden platformasyna kóshý jumystary aıaqtalýǵa jaqyn. Bul týraly Úkimet otyrysynda Qarjy mınıstri Mádı Tákıev aıtty.
– Qarjy mınıstrligi kólik-tranzıt salasyn damytý aıasynda kedendik ákimshilendirýdi tsıfrlandyrý men ótkizý pýnktterin jańǵyrtý boıynsha keshendi jumys atqarýda. Bul Memleket basshysynyń tapsyrmalaryn oryndaýǵa baǵyttalyp, shekarada ashyq jáne ónimdiligi joǵary júıeni qalyptastyrady, - dedi ol.
Mınıstrdiń aıtýynsha, kedendik ákimshilendirýdi tsıfrlandyrýda biryńǵaı Keden platformasyna kóshý jumystary aıaqtalyp jatyr. Ol qoldanystaǵy úsh júıeniń ornyna negizgi rásimderdi avtomattandyrýdy qamtamasyz etedi. Kedendik tranzıt, ıntegratsııalanǵan baqylaý jáne aldyn-ala habarlaý sııaqty 20 modýldiń 16-sy qosyldy.
Onyń ishinde:
– tranzıttik deklaratsııalardyń edáýir bóligi avtomatty túrge shyǵaryldy;
– rásimdeý ýaqyty qysqartyldy, mysaly, tranzıt — 30 mınýttan 10 mınýtqa deıin, konteınerlik poıyz — 3 saǵattan 30 mınýtqa deıin;
– «bir tereze» qaǵıdaty boıynsha Aýyl sharýashylyǵy, Densaýdyq saqtaý jáne Kólik mınıstrlikteriniń qyzmet túrleri ıntegratsııalandy;
– elektrondyq kezek retke keltirildi: durys emes brondaý joıyldy, VIN-kodtar boıynsha baqylaý kúsheıtildi, tez buzylatyn taýarlarǵa, qaýipti júkter men janýarlarǵa, sondaı-aq elimizdiń eksporty úshin jekelegen slottar bólindi;
– servıster tórt tilge aýdaryldy jáne «WeChat» messendjerimen ıntegratsııalandy;
– Qytaı jáne Ózbekstanmen tsıfrlyq ózara is-qımyldy damytý jumystary júrgizildi, onyń ishinde ınspektsııalyq tekserip-qaraý sýretterin ózara taný jáne «jiksiz tranzıt» elementterin engizý jumystary atqaryldy;
– ınspektsııalyq tekserip-qaraý sýretterin avtomatty túrde taldaý jáne sáıkes kelmeıtinderdi aıqyndaý úshin, jasandy ıntellekt elementteri engizildi.
– Bul rásimderdiń tıimdiligi men ashyqtyǵyn arttyrady, adamı faktordyń aralasý táýekelderin azaıtýdy qamtamasyz etedi, - dedi Mádı Tákıev.
Aıta keteıik, Úkimet otyrysynda elimizdiń kólik-tranzıt salasyn damytý men tsıfrlandyrý máselesi talqylandy.