Konteınerlik júkterdiń 30% Qytaı men Eýropaǵa jóneltildi - QTJ
Kompanııanyń málimetinshe, óndiristik qyzmettiń kólemi artyp, júk tasymaly kóbeıgen.
«Júkterdi tasymaldaý kólemi 4% artyp, jalpy kólemi 283 mln tonna júk tasymaldandy. Bul kórsetkish 2017 jylmen salystyrǵanda 11 mln tonnaǵa artyq. Sonymen birge, 2018 jyly 255 tonna júk tıelgen, bul da 2017 jylǵy faktiden 5,3% joǵary. Ásirese, astyq (+36%), untaq (+3%), kómir (+2,6%) tasymalynda ilgerileý bar. Tıelgen júktiń 30% nemese 85 mln tonnasy eksportqa jiberildi. Eksporttyq qatynasta júk tıeý 5,2 mln tonnaǵa nemese 7% artty», - dedi «QTJ-Júk tasymaly» paıdalaný jumystar jónindegi atqarýshy dırektory mindetin atqarýshy Kúmisbek Matjanov.
Atap ótilgendeı, poıyzdar qozǵalysynyń ýchaskelik jáne tehnıkalyq jyldamdyǵy, lokomotıvtiń ortatáýliktik ónimdiligi sııaqty sapalyq kórsetkishter jaqsardy. Otyn-energetıkalyq resýrstar shyǵyny tómendedi.
«Bıyl júk aınalymyn 227 mlrd tonna shaqyrymnan kem túsirmeýdi nemese byltyrǵy kórsetkishten 3,5% ósýdi josparlap otyrmyz. Jumysshylardy oqytý jáne biliktiligin arttyrý jolymen qozǵalys qaýipsizdigin buzý oqıǵalaryn azaıtqymyz keledi. Konteınerlik poıyzdardyń marshrýttyq jyldamdyǵyn arttyrý boıynsha shara qabyldaý josparlanǵan edi. Bıyl bul kórsetkishti 1011 shaqyrymǵa jetkizdik. Konteınerlik poıyzdardyń sany men jyldamdyǵyn arttyrý arqyly, elimizdiń tranzıttik áleýeti artty. Atap aıtqanda, 2018 jyly Qazaqstanda 466 myń konteıner túrli baǵytqa tasymaldandy. Onyń 30 protsentin Qytaı men Eýropa baǵyttary quraıdy», - dedi ol.
Odan bólek, irgeles temirjol ákimshilikterimen elektrondy málimet almasýdy uıymdastyrý, stantsııalar jumysynyń tehnologııasyn qaıta qaraý, jyljymaly quramdy tıimdi paıdalaný jóninde mindetter qoıylyp otyr.
«Áleýmettik turaqtylyqty nyǵaıtý, kez kelgen buzýshylyqqa «nóldik tózimdilik» ustanymy, eńbek jaǵdaıyn jaqsartý jáne óndiristik qaýipsizdikti qamtamasyz etý - jumysymyzdyń basym baǵyttary bolyp qala beredi», - dedi K. Matjanov.
