Konteınerlik tasymaldarǵa júretin memlekettik tarıftik retteý joıylady

ASTANA. QazAqparat - QR Temirjol jolaýshylar kóligi məseleleri jónindegi zań jobasynyń aıasynda endi konteınerlik tasymalǵa júretin memlekettik tarıftik retteýdi alyp tastaý kózdelýde. Bul týraly búgin Investıtsııalar jəne damý mınıstrligi Kólik komıtetiniń tóraǵasy Əset Asavbaev məlim etti.

«Temirjol» tasymaly salasynda júk tasymal kóleminiń azaıyp ketpeýi úshin birqatar sharalardy qolǵa aldyq. Atap aıtsaq, tasymaldar kólemin arttyrý maqsatynda 2015 jyly otandyq óndirýshilerge qazaqstandyq ónimdi tasymaldaý úshin arnaıy temirjol tarıfterine jeńildikter berildi. Bul - otandyq júk jóneltýshilerge 4 mlrd. tonnaǵa jýyq júktiń tasymaldanatyna kepildik berdi. Ekinshiden, tranzıttik júkti tasymaldaýǵa ıkemdi tarıftik saıasat júrgizilip otyr. Bul osy jylǵy tasymaldar kólemin 2014 jyldyń deńgeıinde saqtaý úshin qolǵa alynǵan shara. Mysaly, 2015 jyldyń 7 aıynda Qytaı Halyq Respýblıkasynan Eýropaǵa tranzıtpen ótken konteınerlik tasymaldardyń kólemi 19 649 konteınerdi qurady. Bul aldyńǵy jylmen salystyrǵanda, úsh esege artyq», - deıdi komıtet tóraǵasy. Qazirgi ekonomıkalyq jaǵdaılarǵa qaramastan, temirjol tasymalynyń kólemin azaıtpaýǵa baǵyttalǵan ózge de sharalar týraly aıta kele Əset Asavbaev konteınerlik tasymalǵa júretin memlekettik tarıftik retteý joıylatynyn jetkizdi. «Úshinshiden, Memleket basshysynyń «100 naqty» qadam baǵdarlamasyna səıkes, eýropalyq transqurlyqtyq dəlizdi damytý úshin əzirlengen Zań jobasy konteınerlik tasymaldar kezinde magıstraldi temirjol jelisiniń qyzmetterine júretin memlekettik tarıftik retteýdi alyp tastaýdy kózdep otyr», - dep habarlady ol.