Konteınerlik poıyzdardyń júrý jyldamdyǵy táýligine 1100 shaqyrymǵa deıin artty - Qasymbek
«Kólik ınfraqurylymynyń damýy eki halyqaralyq ındekspen baǵalanady. Birinshiden, 4 kórsetkish boıynsha kólik ınfraqurylymynyń sapasy baǵalanatyn Dúnıejúzilik ekonomıkalyq forýmnyń Básekege qabilettilik jahandyq ındeksi (DEF BJI). Bul - «Áýe kóliginiń ınfraqurylymynyń sapasy», «Avtomobıl joldarynyń sapasy», «Temirjol ınfraqurylymynyń sapasy», «Temirjol ınfraqurylymynyń sapasy» jáne «Porttyq ınfraqurylymynyń sapasy». Jalpy sońǵy 5 jylda «Infraqurylym sapasynyń» kórsetkishi 19 satyǵa kóterildi», - dedi ol.
Ekinshiden, mınıstrdiń aıtýynsha, Dúnıejúzilik bankimen 6 ındıkator negizinde baǵalanatyn logıstıkanyń tıimdilik ındeksi qurylady. Indıkator eldegi logıstıkalyq klımattyń ózgerýin baqylaýǵa múmkindik jasaıdy. Qoldanylǵan sharalar sońǵy eki jylda Qazaqstannyń pozıtsııasyn 11 satyǵa kóterýge múmkindik berdi.
«Kólik ınfraqurylymynyń damýy memleket ekonomıkasynyń ishki qajettiliginen týyndaǵan kólik dálizderin ártaraptandyrýdy qajet etedi. Jalpy, fızıkalyq tosqaýyldardy joıý úshin sońǵy bes jylda 5 myń shaqyrym avtojol qaıta jóndeldi, temir jol jelileriniń uzaqtyǵy 1 703 shaqyrymǵa ulǵaıdy, modernızatsııalaýdy talap etetin 8 áýejaıdyń 4-ýi qaıta jóndeldi, Aqtaý teńiz portynyń ótkizý qabileti 20 mln. tonnaǵa deıin ulǵaıdy», - dedi Qasymbek.
Onyń sózine qaraǵanda qurlyqishilik memleket bola tura, Qazaqstanǵa jańa halyqaralyq dálizderdi salý jáne júk tasymaly úshin barynsha qolaıly sharttardy qurý arqyly tranzıttik áleýetti júzege asyrý qajet.
«Bul úshin shyǵystan batysqa qaraı 1000 shaqyrym araqashyqtyq qysqardy. Konteınerlik poıyzdardyń júrý jyldamdyǵy táýligine 1100 shaqyrymǵa deıin artty. Parsy shyǵanaǵy elderine shyǵýǵa múmkindik jasaldy. Aldaǵy 5 jyldyq kezeńde kólik-logıstıka ınfraqurylymyn damytý «Nurly jol» Memlekettik baǵdarlamasy arqyly iske asyrylady. Jalpy, baǵdarlamada negizginen respýblıkalyq mańyzy bar avtomobıl joldaryn salýdy jáne qaıta jańǵyrtýdy qamtıtyn 16 joba qarastyrylǵan. Baǵdarlama aıasynda 75 myń jańa jumys orny quryldy. Avtojoldardyń qurylysy barysynda jergilikti qamtýdyń deńgeıi 95 paıyzdy quraıdy», - dedi mınıstr.
