«Kontent úshin»: Shymkentte kóligin shyrshamen bezendirgender jaýapqa tartyldy

Jańajyldyq aǵashpen jáne gırlıandalarmen bezendirilgen ınomarkalardy JBO-nyń beınebaqylaý ınspektorlary baıqady. Kazinform bul týraly Rolisia.kz-ke silteme jasap habarlaıdy. 

Osyndaı bezendirýlermen Porsche Panamera, Toyota Camry, Lexus ES, Mercedes-Benz jáne Hyundai Elantra kólikteri Qonaev dańǵylymen Báıdibek bı baǵytynda júrip bara jatqan. Avtomaskaradty jedel jetken patrýldik polıtseıler toqtatty.

Júrgizýshiler óz áreketin jol qozǵalysy qaǵıdasynyń tarmaǵyn bilmegendik dep aqtaǵysy keldi. Alaıda zańdy bilmeý jaýapkershilikten bosatpaıdy: quqyq buzýshylarǵa ÁQBtK-niń 590-baby boıynsha hattama toltyrylyp, kólikter aıypturaqqa jetkizildi.

Belgili bolǵandaı, jigitter bul áreketke tanymal áleýmettik jelidegi kontent úshin barǵan.