«Konsýl» qonaq úıi Almaty polıtseıleriniń nazaryna ilikti
ALMATY. 28 qyrkúıek. QazAqparat /Erlik Erjanuly/ - Almatyda qonaq úıdi jeńil júristilerdiń ordasyna aınaldyrǵan qonaq úı anyqtaldy.
Tekserý kezinde ony kún saıyn jeńil-júristi 60 qyz-kelinshek óz mekenine aınaldyrǵany belgili boldy. Іshki ister departamentiniń baspasóz qyzmetiniń ınspektory Gúlnar Jamanqulovanyń aıtýynsha, jedel ýákilder «Konsýl» qonaq úıi qyzmetkerleriniń zańsyz áreketin áshkereleý úshin arnaıy is-sharalar josparyn jasaǵan.
«Bastapqy kezeńde jezókshelikpen aınalysý úshin prıton uıymdastyrǵan qonaq úıdiń 30-jastaǵy ákimshisi ustaldy. Ol jeńil júristi qyz-kelinshekterdiń árqaısysynan kún saıyn qonaq úıge kirip, óz qyzmetterin klıentterge usyný úshin bes myń teńgeden alyp turǵan. Olar úshin qonaqjaı bólmeleriniń árbir saǵaty alty myń teńgege baǵalanyp otyrǵan. Jedel is-shara kezindegi málimet boıynsha, kún saıyn bul qonaq úıdi 60 jezókshe meken etken», - deıdi qalalyq ІІD-niń Uıymdasqan qylmysqa qarsy kúres basqarmasynyń Adam saýdasymen kúres bóliminiń bastyǵy Tańat Nazanov. Onyń aıtýynsha, aldaǵy ýaqytta prıton uıymdastyrýǵa jol bergen, nemese tikeleı ony ustaǵan qonaq úı qojaıyndary jaýapkershilikke tartylmaq. Buǵan deıin «Maıak», «Pole chýdes» jáne «Sagıshka» qonaq úıleriniń qojaıyndary men ákimshileri áshkerelengen bolatyn. Bul mekemelerdiń qyzmetkerleri men ıelerine qatysty, onyń ishinde uıymdasqan qylmystyq toptar qurǵany úshin birneshe qylmystyq is qozǵaldy.
