Konstıtýtsııanyń jańartylǵan preambýlasy qýatty memlekettiń tańdaýyn kórsetedi – Aıdos Sarym

ASTANA. KAZINFORM – Búgin Konstıtýtsııalyq reformalar jónindegi komıssııanyń (Konstıtýtsııalyq komıssııa) kezekti otyrysynda  Májilis depýtaty Aıdos Sarym Konstıtýtsııanyń preambýlasy boıynsha usynylǵan ózgeriske qatysty pikir aıtty. 

– Osy múmkindikti paıdalanyp, taǵy bir usynys jasaǵym keledi. Keshe óz sektsııamyzda óte belsendi jumys istedik. Osy oraıda Konstıtýtsııanyń preambýlasyna qatysty toqtalmaqpyn. Meniń oıymsha, Prezıdent bolashaq Negizgi zańnyń preambýlasy boıynsha berik ıdeologııalyq tezıster usyndy. Ol ultymyzdyń júrip ótken tarıhı jolyn ǵana emes, sonymen qatar bizdiń maqsatymyzdy, umtylysymyzdy jáne bolashaq perspektıvamyzdy da kórsetedi, - dedi A. Sarym.

Onyń paıymynsha, burynǵy preambýla jańadan paıda bolyp jatqan memleket pen qaýymdastyqtyń jaǵdaıyn aıqyndady. Al qazirgisi - qalyptasqan memlekettiń jaýapty jáne myǵym tańdaýyn bildiredi. Bul óz kezeginde bolashaqqa jáne alǵa qaraı umtylǵan jaýapty qoǵamnyń tańdaýy.

– Bul týraly osy zalda jáne osy minberde kóp aıtyldy. Konstıtýtsııanyń preambýlasy - búkil qujattyń ıdeıalyq negizi, moraldyq baǵdary jáne ıdeologııalyq ımperatıvi... Keshe túzetýler Negizgi zańnyń 80 paıyzdan astamyn qamtıtyny, bul óz kezeginde 77 bapqa áser etkeni jarııalandy. Sondyqtan, osynda sóz sóılegen áriptesterim sııaqty jańa Konstıtýtsııany qabyldaý máselesin kóterý durys jáne oryndy dep sanaımyn, - dedi depýtat.

Buǵan deıin jańa Konstıtýtsııanyń preambýlasy tolyqtaı basqa redaktsııada usynylatyny málim boldy.