Konstıtýtsııanyń jańa normalary memleket pen qoǵam arasyndaǵy senimdi kúsheıtedi – Balaeva

ASTANA. KAZINFORM – Ata zańnyń jańa normalary ádildik, zańdylyq jáne qoǵamdyq kelisim sııaqty rýhanı tuǵyrlardyń ózara baılanysyn tereńdete túsedi. Bul pikirdi Premer-mınıstr orynbasary – Mádenıet jáne aqparat mınıstri Aıda Balaeva Konstıtýtsııalyq komıssııanyń besinshi otyrysynda aıtty. 

Osy kúnderi elimiz tarıhı mezetterdi bastan keshýde. Prezıdenttiń birneshe jyl buryn ádildik pen parasatqa, zań men tártipke súıenip bastaǵan aýqymdy reformalary óziniń eń joǵarǵy quqyqtyq mártebesin alyp, jańǵyrýdyń jańa belesine aıaq basty. Onyń basty ári balamasyz kepili – Ata zań.

– Bul mán-mańyzy jaǵynan da, saıası-quqyqtyq mazmuny turǵysynan da jańa qujat. Prezıdentimiz tarıhı sheshimderdiń zańdy nátıjesi osynaý almaǵaıyp zamannyń talabyna bergen laıyqty jaýaby. Degenmen bul memleketimizdiń osy ýaqytqa deıingi júrgen jolyn joqqa shyǵarý emes, kerisinshe dúbirli dáýirlegen, búgingi kúnge deıingi ozyq oılar emn tájirıbeni tııanaqtap, ketken kemshilikterdi túzep, jetken jetistikti jańalaǵan saıası tabystyń biregeı úlgisi, - dedi mınıstr.

Bul ózgeristiń eń basty leıtmotıvi de − el táýelsizdiginiń tuǵyryn birjola nyǵaıtyp, álem sanasatyn saıası ulttyń qolyna tólqujatyn berip, jol ashý.

– Bul tereń oı «Biz, Qazaqstannyń birtutas halqy» dep bastalatyn Konstıtýtsııanyń jańa kirispesinen-aq jaqsy kórinip tur. Endigi jerde biz adam men azamattyń jeke quqyqtary men mindetterin tutas, ulttyń ómirlik múddelerimen ushtastyrǵan, eshkimdi tili men dinine, tegi men dástúrine qarap alalamaı, zańdy bárinen bıik qoıatyn erejeni alǵa tartamyz. Eń mańyzdysy – Ata zańnyń jańa normalary ádildik, zańdylyq jáne qoǵamdyq kelisim sııaqty rýhanı tuǵyrlardyń ózara baılanysyn tereńdete túsedi. Sózsiz bul memleket pen qoǵam arasyndaǵy senimdi odan ári kúsheıtetin qarymdy qadam, - dedi Aıda Balaeva.