Konstıtýtsııanyń «Jalpy erejeler» bóliminiń ataýyn ózgertý usynyldy – Komıssııa otyrysy
ASTANA. KAZINFORM – Parlamenti Májilisiniń depýtaty Snejanna Imasheva qazirgi Konstıtýtsııanyń «Jalpy erejeler» atty birinshi bóliminiń ataýyn «Konstıtýtsııalyq qurylys negizderi» dep ózgertýdi usyndy.
− «Konstıtýtsııalyq qurylys negizderi» degen ataý bólimde memlekettiń irgetasyn quraıtyn, búkil quqyqtyq júıege baǵdar beretin negizgi qaǵıdalar bekitiletinin bildiredi. Bul memlekettik damýdyń baǵytyn, bıliktiń uıymdastyrýyn jáne Konstıtýtsııanyń ózge normalaryn túsindirýdiń ólshemin aıqyndaıtyn bazalyq erejeler jıyntyǵy. Al «Jalpy erejeler» ataýy beıtarap ári sıpattamalyq sıpatqa ıe bolyp, konstıtýtsııalyq-quqyqtyq turǵydan osy bólimdegi normalardyń ıerarhııalyq mártebesin jetkilikti deńgeıde aıqyndaı bermeıdi, − dedi S.Imasheva elordada ótip jatqan Konstıtýtsııalyq komıssııa otyrysynda.
Onyń aıtýynsha, «Konstıtýtsııalyq qurylys negizderi» ataýy konstıtýtsııalyq quqyqta ornyqqan, teorııa jáne konstıtýtsııalyq baqylaý tájirıbesinde keńinen qoldanylatyn, jalpyǵa birdeı tanylǵan kategorııa sanalady.
Bólimniń ataýyn ózgertý onda qamtylǵan qaǵıdattardyń normatıvtik mártebesin kúsheıtedi, olardy konstıtýtsııalyq baqylaýdy júzege asyrý barysynda jáne quqyqtyq túsindirý protsesinde anaǵurlym naqty ári birmándi qoldanýǵa múmkindik beredi. Sondaı-aq atalǵan normalardy deklaratıvti sıpattaǵy erejeler retinde qabyldaýdy boldyrmaıdy.
− Bul quqyqtyq kollızııalardy sheshýde óte mańyzdy. Óıtkeni konstıtýtsııalyq qurylystyń negizderin aıqyndaıtyn normalar Konstıtýtsııanyń ózge erejeleri men qoldanystaǵy zańnama normalaryna qatysty basymdyqqa ıe bolýy tıis. Sondyqtan Konstıtýtsııa logıka men quqyqtyq aıqyndyq turǵysynan «Konstıtýtsııalyq qurylys negizderi» ataýyn qoldaný oryndy, − dedi Májilis depýtaty.
Aıta keteıik, Prezıdent Ulttyq quryltaıdyń V otyrysynda Ata zańnyń preambýlasyn ulttyq qundylyqtarymyzdy aıshyqtap, qansha zaman ótse de, ózekti bolyp qala beretindeı qaıta jazý keregin aıtqan edi. Onda qazaq jerindegi órkenıet pen memlekettiliktiń tarıhy tereń ekeni naqty kórinis tabýǵa tıis.