Konstıtýtsııanyń Preambýlasy tolyqtaı basqa redaktsııada usynylady
ASTANA. KAZINFORM — Konstıtýtsııanyń Preambýlasy tolyqtaı basqa redaktsııada usynylady. Bul týraly Konstıtýtsııalyq reformalar jónindegi komıssııanyń 4-otyrysynda Konstıtýtsııalyq Sot tóraǵasynyń orynbasary Baqyt Nurmahanov aıtty.
— Konstıtýtsııa bólimderiniń ataýlaryn ózgertý nemese baptardyń mazmunyn naqtylaý jaı redaktsııalyq túzetý emes. Bul tujyrymdamalyq ustanymdardy ózgertetin quqyqtyq naqtylyqty kúsheıtetin jáne negizgi zańnyń sapasyn arttyratyn mańyzdy ári tereń oılastyrǵan qadam. Nátıjesinde, ózgermeli ómirde túrlenip jatqan qoǵamdyq qatynastarǵa saı keletin quqyqtyq normalar belgilenbek, — dedi Baqyt Nurmahanov.
Onyń aıtynsha, Konstıtýtsııanyń Preambýlasy jańa jalpyulttyq qundylyqtar men qazirgi zamanǵy syn-qaterlerdi eskere otyryp, tolyqtaı basqa redaktsııada usynylady.
— Onda negizgi zańdy qabyldaýdyń irgeli maqsattary, qaǵıdattary, qundylyqtary men ýájder aıqyndalǵan. Memlekettiń mıssııasy, onyń tarıhı sabaqtastyǵy men qoǵamdyq baǵdardy aıqyndaıtyn mádenı erekshelikteri kórsetilgen. Bul erejeler jıi qaıta qaraýǵa jatpaıdy jáne uzaqmerzimdi perspektıvada ózektiligin saqtaıdy. Atalǵan bazalyq qaǵıdattar qoǵam men memlekettiń damý vektoryn aıqyndap, Konstıtýtsııanyń barlyq normasyn túsindirýge sheshýshi yqpal etedi, — dedi ol.
Buǵan deıin Konstıtýtsııa mátininiń 84 paıyzy túzetilgenin jazǵan edik.