Konstıtýtsııanyń basty ereksheligi adam kapıtaly – depýtat

ASTANA. KAZINFORM – Májilis depýtaty Ekaterına Smolıakova Jibek Joly telearnasynyń Búgin Live baǵdarlamasynda áleýmettik saıasat pen Konstıtýtsııadaǵy ózgeristerdiń mańyzyna toqtaldy.

Onyń aıtýynsha, qazirgi Konstıtýtsııanyń basty ereksheligi – adam kapıtalyna basymdyq berilýi.

– Áleýmettik másele men áleýmettik saıasat qashanda mańyzdy. Jalpy alǵanda, qazirgi Konstıtýtsııamyzdyń qaq ortasynda adam tur. Eger buryn memlekettik qurylymǵa kóbirek mán berilse, búgingi tańda adamǵa baǵyttalǵan saıasatqa, ıaǵnı adamnyń quqyǵy, qadir-qasıeti men qaýipsizdigine erekshe kóńil bólinip otyr. Bul baǵytta naqty normalar qarastyrylǵan, - dedi depýtat.

Sondaı-aq ol adamı kapıtaldy damytý qazirgi zamanǵy ekonomıkanyń negizgi baǵyty ekenin atap ótti.

– Buryn ekonomıkamyz shıkizattyq, ındýstrııalyq sıpatta boldy. Al qazir búkil álem bilim ekonomıkasyna kóship jatyr. Bilim – ol adam. Sondyqtan adamı kapıtaldy damytý eń durys ári ýaqyt talabyna saı betburys, - dedi Ekaterına Smolıakova.

Depýtat ózgeristerden qoryqpaý kerektigin aıtyp, ony júıeniń jańarýy retinde qabyldaý qajettigin jetkizdi. Onyń sózinshe, Qazaqstan jańa damý kezeńine aıaq basty. Damýdy biz árdaıym jańashyldyq pen ıgilik dep qabyldaýymyz kerek dep atap ótti. 

Sonymen qatar depýtat jahandyq úderisterge de toqtaldy.

– Álem bir orynda turǵan joq. Qazir tsıfrlandyrý qarqyndy damyp keledi. 3-4 jyl buryn jasandy ıntellekt týraly kópshilik bile bermeıtin, al búginde onsyz ómirdi elestetý qıyn. Ekologııalyq ahýal da kúrdelenip otyr: klımat ózgerip, muzdyqtar erip jatyr. Bul ekonomıkaǵa, adam densaýlyǵyna jáne barlyq salaǵa áser etedi. Buǵan qosa geosaıası jaǵdaı da bar. Qazaqstan úlken álemniń bir bóligi, sondyqtan ózgeretin ýaqyt keldi dep oılaımyn, - dedi ol.

Aıtap keteıik, Qazaqstandaǵy saıası reforma eldiń ekonomıkalyq damýyna, demokratııalyq qurylymyn nyǵaıtýǵa jáne halyqaralyq arenadaǵy bedelin arttyrýǵa yqpal etýi múmkin ekenin jazǵanbyz.