Konstıtýtsııanyń adamı kapıtal týraly babyn tolyqtyrý usynyldy
ASTANA. KAZINFORM – Parlamenti Májilisiniń depýtaty Snejanna Imasheva qazirgi Konstıtýtsııanyń adamı kapıtal jónindegi 1-babyn tolyqtyrýdy, árbir azamattyń áleýetin ashýǵa jaǵdaı jasaýdy usyndy.
− 1-bapty jańa tarmaqpen tolyqtyryp, onda «Qazaqstan Respýblıkasy adamı kapıtaldy, bilim berýdi, ǵylymdy, ınnovatsııalardy jáne mádenıetti memleket qyzmetiniń strategııalyq negizi dep tanıdy» dep bekitý usynylady. Bul túzetý Konstıtýtsııaǵa aıqyn strategııalyq baǵdar beredi, ıaǵnı memleket óziniń ornyqty damýy tek ekonomıkalyq resýrstarǵa ǵana emes, eń aldymen adamǵa, onyń bilimine, daǵdylaryna jáne múmkindikterine súıenetinin kórsetedi, − dedi S.Imasheva elordada ótip jatqan Konstıtýtsııalyq komıssııa otyrysynda.
Bul sondaı-aq bıýdjettik saıasatty qalyptastyrýda, memlekettik baǵdarlamalar men reformalardy ázirleý kezinde memleket bilim sapasyn nyǵaıtý, ǵylym men tehnologııalardy qoldaý, mádenı ortany damytý jáne árbir azamattyń áleýetin ashýǵa jaǵdaı jasaý qajettiligin basshylyqqa alýy keregin bildiredi.
Oǵan qosa, 1-baptaǵy «ózin ornyqtyrady» degen tujyrymdy alyp tastaýdy usyndy. Aıtýynsha, bul jaı ǵana redaktsııalyq túzetý emes, onyń mazmundyq sıpaty bar.
− Konstıtýtsııalyq qurylystyń negizderin aıqyndaýda «ózin ornyqtyrady» degen tirkestiń qoldanylýy normaǵa deklaratıvtik reńk berip, ony ekiushty túsindirýge jol ashady. Sonyń ishinde, bul memlekettiń belgilengen quqyqtyq mártebesin emes, belgili bir protsesti nemese nıetti bildiretindeı qabyldanýy múmkin. Usynylyp otyrǵan túzetý Qazaqstan Respýblıkasynyń demokratııalyq, zaıyrly, quqyqtyq jáne áleýmettik memleket retindegi belgilerin konstıtýtsııalyq turǵyda bekitilgen fakt retinde aıqyndaıdy. Bul memlekettik qurylymnyń negizderin aıqyndaıtyn normalardyń tabıǵatyna saı keledi jáne olardyń normatıvtik aıqyndyǵyn arttyrady. Deklaratıvtik formany alyp tastaý normanyń tikeleı áreketin kúsheıtedi jáne ony qoldanýda biryńǵaı tásilder qalyptasýyna yqpal etedi. Sondyqtan biz ózimizdi ornyqtyrmaımyz, eshkimge eshteńe dáleldemeımiz, − dedi Májilis depýtaty.
Buǵan deıin Snejanna Imasheva Konstıtýtsııanyń «Jalpy erejeler» atty birinshi bóliminiń ataýyn «Konstıtýtsııalyq qurylys negizderi» dep ózgertýdi usynǵan edi.