Konstıtýtsııanyń 30 jyldyǵyna arnalǵan kollektsııalyq monetalar aınalysqa shyǵady
ASTANA. KAZINFORM – Qazaqstan Ulttyq banki «Este qalatyn oqıǵalar men birtýar adamdar» serııasynan Qazaqstan Konstıtýtsııasyna 30 jyl kollektsııalyq monetalaryn aınalysqa shyǵarady.
Qazaqstan Konstıtýtsııasynyń 30 jyldyǵy – elimizdiń quqyqtyq memleket qurý jáne demokratııalyq ınstıtýttardy nyǵaıtý jolyndaǵy tarıhı taǵdyryn aıshyqtaıtyn aıtýly data. Ata Zań táýelsizdiktiń irgetasy, birlik pen azamattyq kelisimniń sımvoly sanalady.
Monetalarda el Konstıtýtsııasyn aıshyqtaıtyn ashyq kitap, al onyń ústinde Qazaqstan kartasynyń kontýry fonynda «30» sany beınelengen. Qazaqstan kartasynyń dál ortasyna kúndi beıneleıtin shańyraq ornalasqan. «30» sanyn beıneleý isinde altyn jalatý tehnologııasy qoldanylǵan. Monetanyń ereksheligi de sonda.
Monetalar:
- altyn jalatylǵan 925 synamdy kúmisten jasalǵan. Massasy 31,1 gramm, dıametri 38,61 mm, daıyndaý sapasy – «proof», nomınaly 1 000 teńgelik, taralymy – 1 000 (bir myń) dana;
Nomınaly 1 000 teńgelik monetanyń beınesi
- nıbrass/neızılber qospalarynan (bıkolorly) jasalǵan. Massasy 6,45 gramm, dıametri 24,5 mm, daıyndaý sapasy – «uncirculated», nomınaly 100 teńgelik, taralymy – 5 000 000 (bes mıllıon) dana.
Nomınaly 100 teńgelik monetanyń beınesi
Nomınaly 1 000 teńgelik kúmis monetalardyń QUB ınternet-dúkeni arqyly qashan satýǵa shyǵarylatyny QUB resmı saıtynda qosymsha habarlanady.
Nomınaly 100 teńgelik bıkolorly monetalar tsırkýlıatsııalyq monetalarmen birge el aýmaǵynda erkin aınalymda bolady.
Kollektsııalyq monetalar eldiń búkil aýmaǵynda ózderiniń belgilengen qunyna saı tólemniń barlyq túri boıynsha qabyldanýǵa, sondaı-aq eldiń barlyq bankindegi banktik shottarǵa esepke alynýǵa jáne aýdarym jasalýǵa, usaqtalýǵa jáne aıyrbastalýǵa jatady.
Kollektsııalyq monetalar Qazaqstan teńge saraıynda daıyndaldy.
Aıta ketelik Ulttyq bank bankter úshin eń tómengi rezervtik talaptardy arttyrady.