Konstıtýtsııanyń 30 jyldyǵy: raqymshylyq aıasynda 4,1 myń adam bosaıdy
ASTANA. KAZINFORM — Parlament Májilisiniń qaraýyna «Qazaqstan Respýblıkasy Konstıtýtsııasynyń otyz jyldyǵyna baılanysty raqymshylyq jasaý týraly» zań jobasy kelip tústi.
Májilistiń Zańnama jáne sot-quqyqtyq reforma komıtetiniń tóraǵasy Snejanna Imashevanyń sózine qaraǵanda, zań jobasy Qazaqstan Respýblıkasy Konstıtýtsııasynyń otyz jyldyǵyna baılanysty gýmanızm qaǵıdasy negizinde qylmystyq saıasatty izgilendirý maqsatynda depýtattardyń bastamasymen ázirlendi.
— Qujatta azamattarmen memlekettiń qaýipsizdigine eleýli qater tóndirmeıtin qylmystar jasaǵany úshin sottalǵandardy, onyń ishinde azamattardyń áleýmeýttik osal sanattaryn, kámeletke tolmaǵandardy, kámeletke tolmaǵan balalary bar áıelderdi, júkti áıelderdi, UOS qatysýshylary men múgedekterdi jáne olarǵa teńestirilgen adamdardy, zeınetkerlerdi, múgedekterdi jáne basqalardy bosatý usynylady, — dedi S. Imasheva Májilistiń jalpy otyrysynda.
Sonymen qatar, Májilis depýtaty Únzıla Shapaq tilshilerge bergen suhbatynda naqty bosatylýy múmkin adamdardyń sanyn atap ótti.
— 4,1 myń adam bosatylady. Aldyn ala esepteýlerge toqtalsaq, qylmystyq atqarý mekemelerinen shamamen 632 sottalǵan, probatsııa qyzmetiniń tiziminde turǵan 3,5 myń adam bosaıdy. Al bas bostandyǵynan aıyrý oryndaryndaǵy 5,4 myń sottalǵanǵa jáne probatsııa qyzmetiniń esebinde turǵan 5,5 adamǵa jazanyń ótelmegen merzimin saralap qysqartý qoldanylady. Sonda, barlyq merzim qysqartý 11 myń adamdy qamtıdy, — dedi Ú. Shapaq.
Depýtattyń aıtýynsha, 833 áıelge qatysty raqymshylyq jasalady. Sonyń arasynda 109-y bosatylsa, 724 áıeldiń jazany óteý merzimi qysqartylady.
Eske salsaq, Qazaqstan túrmelerindegi 1 myńnan astam áıel raqymshylyqqa ilinýi múmkin ekenin jazǵan edik.