Konstıtýtsııanyń 30 jyldyǵy: Esirtki kómgishter raqymshylyqqa iline me

ASTANA. KAZINFORM – Konstıtýtsııanyń 30 jyldyǵyna oraı keıbir sottalǵandarǵa raqymshylyq jasaýdy kózdeıtin zań jobasyn talqylaý kezinde depýtat Danabek Isabekov esirtki kómip, taratqany úshin sottalǵan jastar nege raqymshylyqqa ilinbeı qalǵanyn surady.

Zań jobasyn tanystyrǵan depýtat Abzal Quspan bul másele jumys tobynda qyzý talqylanǵanyn aıtty.

- Bul másele jumys tobynyń kún tártibinde qaraldy. Bir emes, birneshe ret talqyǵa saldyq. Bıyl Qylmystyq kodekske ózgertýler men tolyqtyrýlar berý arqyly ózińiz aıtyp otyrǵan esirtki kómgishterdiń jazasyn edáýir jeńildettik. Buryn olardyń áreketi «asa aýyr» qylmys sanatynda bolsa, qazir «aýyr qylmys sanatyna túsirdik. Tıisinshe saralaý jasap, esirtki zattaryn daıyndap, uıymdastyrǵan azamattardyń áreketin aýyrlatyp, esirtki kómgishterdiń áreketin jeńildettik. Sonyń saldarynan qazirgi tańda bul azamattardyń kópshiligi merziminen shartty túrde bosap shyǵý nemese neǵurlym jeńiz jazaǵa aýystyrý arqyly bosap shyǵýǵa múmkindigi bar, - degen depýtat ol sózine naqty málimetterdi mysal etip keltirdi.

Aıtýynsha, búginge deıin esirtki kómgeni úshin 415 adam qamaýdan bosap shyqqan. Taǵy 2 myńnan astam adamnyń zańdaǵy ózgeristerdi paıdalanyp bosap shyǵýyna múmkindigi bar.

- Ekinshiden, esirtki taratqan azamattarǵa raqymshylyq qoldaný máselesin talqylaǵan kezde depýttardyń basym kópshiligi buǵan qarsy pikir bildirdi. Óıtkeni bıyldyń ózinde jeńildik berilip otyr degendi aıtty. Onyń ústine esirtki kómgishterdiń kesirinen zardap shekken jábirlenýshilerdiń jaǵdaıyn da oılaýymyz kerek. Olardyń otbasy, densaýlyǵy, quqyqtary buzyldy. Áli kúnge deıin uzaq emdeý is-sharalarymen áýre bolyp júrgenin umytpaýymyz kerek. Qazaqstanda esirtkimen baılanysty qylmys sany azaımaı otyr. Onyń óristeýine osy esirtki kómgishterdiń tikeleı áseri bar ekenin joqqa shyǵara almaımyz. Sondyqtan bul joly bul sanattaǵy azamattar raqymshylyq aktsııasyna ilikken joq. Biraq esirtkige qatysty 296-baptyń 1, 2-bóligine (esirtki ózi tutyný úshin saqtaý qylmysy – red.) tolyǵymen raqymshylyq qoldanylady. Sondaı-aq, 297-baptyń 1-bóligi (esirtki, psıhotroptyq zattardy, sol tektesterdi ótkizý maqsatymen zańsyz ıemdený, saqtaý, tasymaldaý, olardy jóneltý ne ótkizý – red.) túsip otyr, - dep túsindirdi Abzal Quspan.

Bas prokýrordyń orynbasary Áset Shyndalıev te osy ustanymdy qoldaıtynyn aıtty. Ol depýtattardyń esine jemqorlyq eldiń el ekonomıkasynyń keleshegine qandaı zııan keltirse, esirtki qoǵamnyń bolashaǵyna sondaı zııan keltiretinin saldy. 

Eske salsaq, Konstıtýtsııanyń 30 jyldyǵyna arnalǵan raqymshylyq aıasynda 4,1 myń adam bosaıtyny málim bolǵan edi.