«Konstıtýtsııany kúlki qylý – halyqty kemsitý»: Toqaev qatań eskertý jasady
ASTANA. KAZINFORM — Qasym-Jomart Toqaev Qaýipsizdik Keńesiniń shuǵyl otyrysynda «Samuryq Qazyna» ulttyq ál-aýqat qory men «Qazaqstan temir joly» UK» AQ basshylarynyń ustalýyna baılanysty málimdeme jasady.
Prezıdent Konstıtýtsııanyń negizgi erejelerin saqtamaǵandar «Zań men Tártip» qaǵıdatyna sáıkes qatań jazalanatynyn aıtty.
— Konstıtýtsııa — memleketimizdiń negizgi zańy, bul – halqymyzdyń quqyqtyq tólqujaty. Sondyqtan Konstıtýtsııany kúlki qylý, onyń negizgi erejelerin mensinbeý halqymyzdy kemsitýmen birdeı. Ondaı áreket jasaǵandar «Zań men Tártip» qaǵıdatyna sáıkes qatań túrde jazaǵa tartylatyn bolady. Másele memleketimizdiń abyroıy, qoǵamnyń ulttyq ınstıtýttarǵa degen senimi, Qazaqstannyń halyqaralyq bedeli týraly bolǵanda biz, halyq bılik etý ókildigin bergen tulǵalar, ult múddesin qorǵaý jolynda aıanbaı eńbek etýimiz kerek, sol úshin qolymyzdan kelgenniń bárin jasaýymyz kerek. Bul – azamattyq jáne saıası boryshymyz, — dedi Memleket basshysy.
Prezıdent «Samuryq-Qazyna» qory elimizdiń strategııalyq aktıvterin basqarady, aýqymdy ınvestıtsııalyq jobalardy júzege asyrady, asa iri sheteldik kompanııalarmen jáne halyqaralyq qarjy ınstıtýttarymen tyǵyz baılanysta jumys isteıtinin aıtty.
— Túptep kelgende, kez kelgen kelisimniń, seriktestiktiń artynda uzaq jyldar boıy jasalatyn kóptegen kelissózder, sonyń ishinde halyqaralyq qaýymdastyqtyń elimizge degen úlken senimi men memleketimizge júktelgen naqty mindetter turady, — dedi Toqaev.
