Konstıtýtsııa Qazaqstan táýelsizdiginiń, qazaq memlekettiliginiń berik tuǵyryna aınaldy — Prezıdent
ASTANA. KAZINFORM — Memleket basshysy Qasym-Jomart Toqaev qazaqstandyqtardy Konstıtýtsııa kúnimen quttyqtady, dep habarlaıdy Aqordanyń baspasóz qyzmeti.
Memleket basshysy Qasym-Jomart Toqaevtyń Konstıtýtsııa kúnimen quttyqtaýy jarııalandy. Prezıdenttiń sózinshe, osydan 30 jyl buryn ótken referendýmda halqymyz Ata zańyn qabyldap, tarıhı tańdaýyn jasady.
— Qurmetti otandastar! Barshańyzdy Konstıtýtsııa kúnimen quttyqtaımyn! Osydan 30 jyl buryn ótken referendýmda halqymyz Ata zańyn qabyldap, tarıhı tańdaýyn jasady. Konstıtýtsııamyz Qazaqstan Respýblıkasy táýelsizdiginiń, qazaq memlekettiliginiń berik tuǵyryna aınaldy. Onda ultymyzdyń búginin jáne bolashaǵyn aıqyndaıtyn myzǵymas qundylyqtar men qaǵıdattar naqty kórinis tapty. Ata zań Qazaqstannyń barlyq azamatynyń múddesin ultyna, dinine qaramastan birdeı qorǵaıtyn áleýmettik memleket retindegi quqyqtyq irgetasyn qalyptastyrdy. Konstıtýtsııa qoǵamdyq kelisim men ishki turaqtylyqtyń basty kepili sanalady. San túrli saladaǵy jetistikterge osy negizgi zańymyzǵa súıene otyryp qol jetkizdik. Úsh jyl buryn el damýynyń jańa tarıhı kezeńindegi mindetterge sáıkes, aýqymdy konstıtýtsııalyq reforma jasaldy. Onyń basty nátıjesi — saıası júıeniń «Kúshti Prezıdent — yqpaldy Parlament — esep beretin Úkimet» tujyrymdamasynyń negizinde jańǵyrýy. Konstıtýtsııalyq reformada adam quqyqtaryn qorǵaýǵa, Zań men tártip ústemdigin ornyqtyrýǵa basa mán berildi. Ata zańǵa álemdik tájirıbede buryn-sońdy bolmaǵan, ınnovatsııalyq sıpattaǵy birqatar jańa ereje engizildi, — dedi Toqaev.
Qasym-Jomart Toqaev Qazaqstannyń konstıtýtsııalyq reformasyna Venetsııa komıssııasy jáne ózge de bedeldi halyqaralyq uıymdar, sondaı-aq sheteldik sarapshylar oń baǵasyn bergenin aıtty.
— Ádiletti, Taza, Qýatty ári Qaýipsiz Qazaqstan quramyz desek, azamattarymyz Ata zańdy qurmettep, onyń barlyq erejesin múltiksiz saqtaýy kerek. Qazaqstan Respýblıkasynyń strategııalyq maqsattaryna ultymyzdy jumyldyratyn Konstıtýtsııamyzdyń aıasynda barsha azamatymyzdyń Otanymyzdy órkendetý úshin jasampazdyqpen eńbek etýine barlyq jaǵdaı jasalǵan. Elimizdiń barsha azamatyna zor densaýlyq, baq-bereke tileımin! — dedi Prezıdent.
Buǵan deıin Qasym-Jomart Toqaev QR Konstıtýtsııasynyń 30 jyldyǵyna arnalǵan «Konstıtýtsııa jáne memlekettilik: quqyq pen bolashaq dıalogy» atty ǵylymı-praktıkalyq konferentsııasyna qatysyp, sóz sóıledi.
Sonymen qatar búgin Qytaıdyń eń iri basylymy China Daily Qazaqstan Prezıdenti Qasym-Jomart Toqaevtyń «Qazaqstan men Qytaıdyń berik ári senimdi qarym-qatynasy – tabysty yntymaqtastyqtyń kepili» atty maqalasyn jarııalady. Kazinform osy materıaldyń beıresmı aýdarmasyn oqyrmandar nazaryna usynady.