Konstıtýtsııalyq komıssııa múshesi sot sanktsııasynsyz ustaý merzimin 72 saǵattan 48 saǵatqa deıin qysqartýdy usyndy
ASTANA. KAZINFORM — Konstıtýtsııalyq reforma jónindegi komıssııanyń múshesi, Respýblıkalyq advokattar alqasynyń tóraǵasy Mádı Myrzaǵaraev Qazaqstan aýmaǵynda sot sanktsııasynsyz ustaý merzimin 72 saǵattan 48 saǵatqa deıin qysqartýdy usyndy.
— Adam quqyǵynyń túpki negizi — jeke bas bostandyǵy. Eshkimniń zańsyz ustalýyna jol berilmeýge tıis. Qamaý — tek sot sheshimimen ǵana oryndalatyn eń aýyr shara. Bul — talqylaýdy qajet etpeıtin irgeli qaǵıdat. Degenmen tergeý múddesi men obektıvti shyndyqty eskermeýge de bolmaıdy. Ýaqytsha ustaý — tergeýdiń alǵashqy kezeńindegi májbúrli aıryqsha shara. Biraq osy ýaqytsha sharanyń ózi meılinshe qysqa merzimge ǵana qoldanylýǵa tıis. Eń bastysy, sot qaraýyna tez arada jetkizý kerek. Tehnologııalar damyǵan búgingi zamanda materıaldardy sotqa usyný úshin uzaq ýaqyttyń qajeti joq. Negizgi tergeý áreketteri alǵashqy táýlikte-aq atqarylady. Sot baqylaýyn erterek iske qosý azamatqa ǵana emes, memleketke de tıimdi. Sot sanktsııasy — tergeý zańdylyǵynyń basty kepili jáne qoǵam seniminiń tiregi. Osy rette halyqaralyq ozyq tájirıbeni eskere otyryp, Konstıtýtsııada sot sanktsııasynsyz ustaý merzimin 72 saǵattan 48 saǵatqa deıin qysqartýdy usynamyn, — dedi ol Konstıtýtsııalyq komıssııanyń alǵashqy otyrysynda.
Sondaı-aq, ol Mıranda qaǵıdatynyń zań praktıkasyndaǵy ústemdigi qanshalyqty mańyzdy ekenine toqtaldy.
— Adamǵa ne sebepti ustalǵanyn jáne onyń qandaı quqyqtary bar ekenin dál sol sátte esh kidirissiz, anyq jetkizý kerek. Bul qaǵıda — azamatty ǵana emes, memlekettiń bedelin de qorǵaıtyn tetik. Ashyqtyq bar jerde negizsiz úreı emes, órkenıetti quqyqtyq dıalog qalyptasady. Halyqaralyq deńgeıde moıyndalǵan Mıranda qaǵıdasy — quqyqtyq memlekettiń myzǵymas ólshemi. Azamat óz quqyǵyn taǵdyry tarazyǵa túsken alǵashqy mınýttan bastap bilýge tıis. Dál osy syndarly sátte adam memlekettiń qatal kúshin emes, onyń ádil qorǵanyn seziný qajet. Al sol quqyqtardyń ishindegi eń mańyzdysy — kásibı advokattardyń kómegine júginý quqyǵy. Advokattyń kómeginsiz quqyq — qaǵaz júzindegi deklaratsııa ǵana. Al kásibı advokattyń qatysýy sol quqyqtyń naqty iske asýy men shynaıy qorǵaýdyń kepili. Sondyqtan ustalǵan adamǵa onyń quqyqtaryn, sonyń ishinde advokat kómegine júginý múmkindigin ustaý sátinen bastap túsindirýdi Konstıtýtsııa deńgeıinde bekitýdi usynamyn, — dedi Mádı Myrzaǵaraev.
Buǵan deıin Konstıtýtsııalyq komıssııanyń quramynda kimder kirgenin jazǵan edik.