Konstıtýtsııalyq zańdylyqty qamtamasyz etý – barlyq memlekettik organnyń mindeti – Elvıra Azımova
ASTANA. KAZINFORM – Konstıtýtsııalyq Cot jáne Parlamentarızm ınstıtýty mamandary birlesip, «Konstıtýtsııa: quqyq ústemdiginiń, azamattyq qoǵamnyń jáne qazirgi memlekettiń qundylyqtaryn iske asyrý» taqyrybynda Halyqaralyq ǵylymı-praktıkalyq konferentsııasyn uıymdastyrdy.
Іs-sharaǵa Konstıtýtsııalyq Sottyń sýdıalary, Parlament depýtattary, memlekettik organdardyń, ǵylymı jáne zań qoǵamdastyǵynyń, EQYU-nyń Astanadaǵy keńsesiniń ókilderi, sondaı-aq Germanııa, Fınlıandııa, Shveıtsarııa, Ózbekstan jáne Qyrǵyzstan memleketteriniń sarapshylary qatysty. Olar adam quqyqtary men bostandyqtaryn ilgeriletýdegi konstıtýtsııalyq baqylaýdyń róli týraly pikir almasty.
Basty nazar memleket pen qoǵamnyń turaqty damýyn qamtamasyz etý kontekstinde konstıtýtsııalyq sot tóreligin jetildirýge aýdaryldy. Halyqaralyq sarapshylar konstıtýtsııalyq baqylaýdyń óz tásilderi men úlgilerin usyndy.
Konstıtýtsııalyq Sottyń Tóraǵasy Elvıra Azımova óz sózinde qatysýshylardy aldaǵy Konstıtýtsııa kúnimen quttyqtap, kópjaqty dıalogtyń mańyzdylyǵyn atap ótti. Ol konstıtýtsııalyq zańdylyqty qamtamasyz etý – barlyq memlekettik organdar men laýazymdy tulǵalardyń zań shyǵarý jáne quqyq qoldaný aıasyndaǵy ortaq mindeti ekenin atap ótti.
«Memlekettik organdar men laýazymdy adamdar osy baǵytta júıeli, josparly jáne maqsatty túrde jumys isteýi tıis. Bul rette, azamattardyń qatysýy osy protseske óz yqpalyn tıgizedi. Sondyqtan azamattarymyzdyń quqyqtyq mádenıetiniń joǵary deńgeıi memlekettilikti nyǵaıtýǵa, qaýipsizdik pen quqyqtyq tártipti saqtaýǵa túrtki bolady», - dedi Elvıra Azımova.
Aıta keteıik, jyl basynan beri Konstıtýtsııalyq Sotqa azamattardan 7 myńnan astam ótinish kelip túsken. Azamattardyń ótinishterin qaraý qorytyndysy boıynsha 252 sheshim qabyldanǵan. Onyń ishinde 50 normatıvtik qaýly zańdar men zańǵa táýeldi aktilerdiń naqty normalarynyń Konstıtýtsııaǵa sáıkestigin tekserýdiń mánine qatysty ekenin atap ótken jón.
Parlamentarızm Instıtýtynyń dırektory, zań ǵylymdarynyń doktory Qanatbek Savınov Konstıtýtsııa tek quqyqtyq akt emes ekenin, ol bizdiń qoǵamymyzdyń turaqtylyǵy men órkendeýine kepildik beretin memlekettik qurylymymyzdyń negizi ekenin atap ótti. Ol Qazaqstannyń negizgi Zańy eldiń uzaq merzimdi damý baǵytyn aıqyndaıtyn myzǵymas qundylyqtardy, sonyń ishinde halyq bıligi, teńdik, birlik jáne zań ústemdigi qaǵıdattaryn kórsetetinin basa aıtty.
Sarapshylardyń aıtýynsha, konferentsııa barysynda ázirlengen usynymdar eldegi quqyq ústemdigin nyǵaıtýǵa jáne konstıtýtsııalyq sot tóreligin odan ári jetildirýge baǵyttalǵan. Jıynnyń qorytyndysy boıynsha memleket, qoǵam jáne halyqaralyq sarapshylar arasyndaǵy dıalogtyń mańyzdylyǵy atap ótildi. Bul – demokratııalyq qundylyqtardy ilgeriletý jáne zańnyń ústemdigin qamtamasyz etý úshin óte mańyzdy, dedi sarapshylar.
