Konstıtýtsııalyq Sottyń quzyryna qatysty normalar saqtalady – Baqyt Nurmuhanov

ASTANA. KAZINFORM – Jańa Konstıtýtsııanyń jobasynda Konstıtýtsııalyq Sot qabyldaǵan sheshimderdiń quqyqtyq saldary naqty jazyldy. Bul týraly Konstıtýtsııalyq reformalar jónindegi komıssııanyń otyrysynda Konstıtýtsııalyq Sot tóraǵasynyń orynbasary Baqyt Nurmuhanov málim etti.

– «Konstıtýtsııalyq Sotqa» qatysty normalar jetinshi bólimde shoǵyrlandyryldy. Konstıtýtsııalyq Sottyń quramyna, sýdıalardyń ókilettik merzimderine jáne quzyryna qatysty normalar negizinen saqtaldy. Konstıtýtsııalyq Sottyń – konstıtýtsııalyq baqylaý júrgizetin jáne búkil el aýmaǵynda Konstıtýtsııanyń ústemdigin qamtamasyz etetin táýelsiz memlekettik organ retindegi mıssııasy belgilendi, - dedi Baqyt Nurmuhanov jańa Konstıtýtsııanyń jobasyn tanystyrý kezinde.

Osy oraıda ol Konstıtýtsııalyq Sotqa ókilettikter berilip jatqanyn aıtty.

– Sóz basynda qorytyndylar berý týraly aıtyp óttim. Oǵan qosymsha halyqaralyq uıymdar men olardyń organdary sheshimderi oryndalýynyń Konstıtýtsııaǵa sáıkestigin qaraý júktelmek. Bul másele boıynsha Respýblıka Prezıdenti, Quryltaı Tóraǵasy, Quryltaı depýtattary jalpy sanynyń keminde besten biri, Premer-Mınıstr jáne Bas prokýror ótinish bere alady. Konstıtýtsııalyq Sot qabyldaǵan sheshimderdiń quqyqtyq saldary naqty jazyldy. Konstıtýtsııalyq Sot oryndalýy Konstıtýtsııaǵa sáıkes kelmeıdi dep tanyǵan halyqaralyq uıymdar men olardyń organdarynyń sheshimderi oryndalmaýǵa tıis. Konstıtýtsııalyq Sot bergen túsindirmede Konstıtýtsııaǵa sáıkes keledi dep tanylǵan zańdar men ózge de normatıvtik-quqyqtyq aktiler berilgen túsindirmede ǵana qoldanylýǵa tıis dep bekitilip otyr, - dedi Konstıtýtsııalyq Sot tóraǵasynyń orynbasary.

Buǵan deıin Jańa Konstıtýtsııanyń sońǵy nusqasynda 95 bap bolatynyn habarlaǵanbyz.