Konstıtýtsııalyq sotqa azamattardan 5 myńnan astam ótinish tústi — Elvıra Ázimova
ASTANA. KAZINFORM — Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova sottyń Qazaqstandaǵy konstıtýtsııalyq zańdylyqtyń 2023 jyldaǵy jaı-kúıi týraly joldaýyn jarııalap jatyr.
«Konstıtýtsııalyq zańdylyqty bekitý memlekettiń qabyldanǵan barlyq mindettemelerdi oryndaý, azamattardyń quqyqtary men mindetterin saqtaýdyń turaqtylyǵyn qoldaý, árkimge sot arqyly qorǵalý quqyǵyn iske asyrý múmkindigin berý, adamnyń jáne azamattyń quqyqtary men bostandyqtaryn shekteýdiń mólsherlestigi, qabyldanǵan mindettemeler tıisinshe oryndalmaǵan jaǵdaıda memlekettiń jeke adam aldyndaǵy konstıtýtsııalyq-quqyqtyq jaýapkershiligi mindetterin kózdeıdi. Respýblıkalyq referendým nátıjeleri boıynsha aıqyndalǵan konstıtýtsııalyq qundylyqtar zańnamalyq jáne ózge de normatıvtik quqyqtyq aktilerde, quqyq qorǵaý tetikterin jáne qoǵamdyq baqylaýdy nyǵaıtý sharalarynda logıkalyq jáne dáıekti kórinis tapty», — dedi ol.
Onyń atap ótýinshe, ótken jyly konstıtýtsııalyq baqylaý organyna azamattardyń 5 myńnan astam ótinishi kelip tústi.
«Azamattar zeınetaqy zańnamasynyń, Qylmystyq jáne Qylmystyq-protsestik kodeksterdiń, Ákimshilik quqyq buzýshylyq týraly kodekstiń jáne Joǵarǵy Sottyń normatıvtik qaýlylarynyń jekelegen normalarynyń Konstıtýtsııaǵa sáıkestigin tekserýge qatysty júgindi. Azamattardan kelip túsken ótinishterdiń basym bóligi naqty ister boıynsha jalpy ıýrısdıktsııa sot sheshimderiniń kúshin joıý nemese olardy qaıta qaraý týraly, sotqa deıingi tergep-tekserýdiń jáne quqyq qorǵaý organdarynyń jekelegen qyzmetkerleriniń ózge de áreketteriniń zańdylyǵyn tekserý týraly boldy. Basqasha aıtqanda, mundaı ótinishter Konstıtýtsııalyq sottyń quzyretine kirmeıdi. Olar jalpy ıýrısdıktsııa sottarynyń nemese basqa memlekettik organdardyń qaraýyna jatady», — dedi Elvıra Ázimova.
