Konstıtýtsııalyq sotqa 9 myń azamattan ótinish túsken

ASTANA. KAZINFORM –Májilistiń jalpy otyrysynda palata tóraǵasy Erlan Qoshanov Prezıdent Qasym-Jomart Toqaev bastamashy bolǵan saıası reformanyń zań ústemdigin ornatýdaǵy orny týraly paıymyn aıtty.

- Konstıtýtsııalyq sottyń qurylýy sot tóreligi men azamattardyń quqyqtaryn qorǵaýdaǵy jańa lep boldy. Bul quqyqtyq memleketti nyǵaıtý men ádilettilikti qamtamasyz etýdegi mańyzdy qadam. Atalǵan ınstıtýt jańa quqyqtyq arhıtektýranyń ózegi bolmaq. Konstıtýtsııalyq sotqa qarapaıym adamdardan toǵyz myńnan astam ótinish túsken, - dedi Erlan Qoshanov. 

Sondaı-aq, Májilis spıkeri Adam quqyqtary jónindegi ýákil ınstıtýtyna konstıtýtsııalyq mártebe berilgenin eske saldy. 

- Balalar ombýdsmeniniń jumysy aıtarlyqtaı jańartyldy. Prezıdenttiń ombýdsmenderdi tikeleı qoldaýy halyq quqyǵyn qorǵaýdyń sapasyn jańa deńgeıge kótergenin ýaqyt kórsetip otyr, - dedi palata tóraǵasy.

Buǵan deıin Premer-mınıstr Oljas Bektenov Úkimettiń resmı saıtyna «Іlgerileýge bastaǵan alty jyl: Qazaqstan ornyqty damý jolynda» maqala jarııalaǵan edi.