Konstıtýtsııalyq Sot jer daýlaryna qatysty Joǵarǵy Sot qaýlysyn tekseredi
ASTANA. KAZINFORM — Qazaqstan Respýblıkasynyń Konstıtýtsııalyq Soty Joǵarǵy Sottyń jer zańnamasyn qoldanýǵa qatysty normatıvtik qaýlysynyń bir erejesiniń Konstıtýtsııaǵa sáıkestigin tekserý týraly ótinishti is júrgizýge qabyldady.
Daýly erejege sáıkes, jer ýchaskeleriniń shekaralary qabattasqan jaǵdaıda týyndaǵan daýlardy sheshý kezinde tarıhı qalyptasqan shekaralar negizge alynýy kerek.
Ótinish berýshiniń pikirinshe, bul talap jeke menshik quqyǵyna berilgen konstıtýtsııalyq kepildikterge sáıkes kelmeıdi.
— Sondaı-aq ótinish berýshi Joǵarǵy Sottyń normatıvtik qaýlylary qoldanystaǵy quqyqtyń quramdas bóligi sanalatynyn jáne sottar úshin mindetti ekenin atap ótken. Sondyqtan mundaı qaýlylar Konstıtýtsııaǵa qaıshy kelmeýge, sondaı-aq onda kepildik berilgen quqyqtar men bostandyqtardy shektemeýge tıis dep esepteıdi, — delingen habarlamada.
Konstıtýtsııalyq Sot daýly erejeniń mazmuny men maqsatyn, sondaı-aq onyń quqyq qoldaný tájirıbesindegi mańyzyn eskere otyryp, onyń Konstıtýtsııaǵa sáıkestigine baǵa beredi.
Іstiń qaralý barysy men qorytyndysy týraly aqparat Konstıtýtsııalyq Sottyń resmı ınternet-resýrsynda jarııalanady.
Eske salaıyq, buǵan deıin Konstıtýtsııalyq Sot kredıtordyń sanatyna qaraı sot arqyly bankrottyq rásimine qol jetkizýdiń ártúrli bolýyna qatysty másele kóterilgen ótinishti qaraǵanyn jazǵanbyz.
