Konstıtýtsııalyq Sot jeke sot oryndaýshylaryna qatysty erejeni qaraýdan bas tartty

ASTANA. KAZINFORM — Konstıtýtsııalyq Sot jeke sot oryndaýshylarynyń tártiptik jaýapkershiligi týraly erejeni tekserýden bas tartqanyn málim etti. 

Konstıtýtsııalyq Sot azamattyń QR Konstıtýtsııasynyń 3-babynyń 4-tarmaǵyna jáne 4-babynyń 1-tarmaǵyna Respýblıkalyq jeke sot oryndaýshylary palatasynyń Tóralqasy bekitken Jeke sot oryndaýshylarynyń tártiptik jaýaptylyǵy týraly erejege sáıkestigin tekserý týraly ótinishin qarady.

Ótinishte azamat Ádilet mınıstrliginiń jeke sot oryndaýshysyn memlekettik lıtsenzııadan aıyrý týraly talap-aryzyna baılanysty sot talqylaýy sheńberinde atalǵan erejeni qoldanýdyń zańdylyǵyna daý aıtyp júgindi.

Ótinishti jáne qosa berilip otyrǵan materıaldardy zerdeleý qorytyndysy boıynsha Konstıtýtsııalyq Sot mynadaı qorytyndyǵa keldi:

— daýlanyp otyrǵan ereje «Quqyqtyq aktiler týraly» Qazaqstan Respýblıkasy Zańy boıynsha normatıvtik quqyqtyq akti bolyp tabylmaıdy, óıtkeni ony ýákiletti memlekettik organ qabyldamaıdy jáne jalpyǵa mindetti normalardy qamtymaıdy;
— ótinish berýshiniń dálelderi zańdy kúshine engen sot aktilerimen kelispeý bolyp tabylady, al bul Konstıtýtsııalyq Sottyń qaraý nysanasyna kirmeıdi;
— «Qazaqstan Respýblıkasynyń Konstıtýtsııalyq Soty týraly» Konstıtýtsııalyq zańyna sáıkes jol berilý sharttaryna sáıkes kelmeıtin ótinishter konstıtýtsııalyq is júrgizýge qabyldanýǵa jatpaıdy.

— Konstıtýtsııalyq zańnyń 48-baby 3-tarmaǵynyń 1) jáne 2) tarmaqshalarynyń negizinde Konstıtýtsııalyq Sottyń qaýlysymen ótinishti konstıtýtsııalyq is júrgizýge qabyldaýdan bas tartyldy, — delingen habarlamada.

Osydan buryn Konstıtýtsııalyq Sot shet eldiń azamattary Qazaqstanda qoǵamdyq birlestikterge múshe bola alady, alaıda quryltaıshy bolý quqyǵy joq ekenin aıtyp, málimdeme jasady.