Konstıtýtsııalyq Sot jańa Ata zań aıasynda quqyq ústemdigin nyǵaıtty
ASTANA. KAZINFORM — Qazaqstan Respýblıkasynyń Konstıtýtsııalyq Soty Tóraǵasy Elvıra Azımova BUU Adam quqyqtary jónindegi keńesi janyndaǵy damý quqyǵy máselesi jónindegi arnaıy baıandamashy Surya Devamen kezdesý ótkizdi.
Qazaqstanǵa sapary aıasynda Surya Deva Astana men Túrkistan qalalarynda bolyp, Qazaqstandaǵy damý quqyǵyn qamtamasyz etý, ornyqty damý qaǵıdattaryn iske asyrý jáne adam quqyqtaryn qorǵaý tetikteriniń jaı-kúıimen tanysty. Salystyrmaly konstıtýtsııalyq quqyq salasynyń mamany, Macquarie University professory ári adam quqyqtary men ornyqty damý máseleleri boıynsha sarapshy retinde Surya Deva Qazaqstandaǵy konstıtýtsııalyq reformalarǵa jáne júzege asyrylyp jatqan ózgeristerdiń kútiletin nátıjelerine erekshe qyzyǵýshylyq tanytty.
Elvıra Azımova Konstıtýtsııalyq Sottyń mandaty men onyń elimizdiń quqyq qorǵaý áleýetin nyǵaıtýdaǵy róli týraly jan-jaqty baıandady. Konstıtýtsııalyq Sot elimizdiń jańa Ata zańynyń negizgi baǵyttaryn aıqyndaǵan konstıtýtsııalyq reforma kezeńindegi basty ınstıtýtsıonaldyq alańdardyń birine aınalǵany atap ótildi.
— Konstıtýtsııalyq Sot Tóraǵasy arnaıy baıandamashyny 2026 jylǵy 1 shildeden bastap Qazaqstanda osy jylǵy 15 naýryzda respýblıkalyq referendýmda qabyldanǵan jańa Konstıtýtsııanyń kúshine enetini týraly habardar etti. Jańa Ata zań azamattardyń quqyqtary men bostandyqtaryn keńeıtýge, quqyq ústemdigi qaǵıdattaryn nyǵaıtýǵa jáne memlekettiń áleýmettik baǵdaryn kúsheıtýge baǵyttalǵan. Kezdesý barysynda quqyq ústemdigi, sot tóreliginiń qoljetimdiligi jáne sot júıesindegi áıelderdiń róli máselelerine erekshe nazar aýdaryldy, — delingen habarlamada.
Surya Deva búginde quramynda úsh áıel sýdıa qyzmet etetin Qazaqstannyń Konstıtýtsııalyq Sotyndaǵy áıelderdiń ókildigine oń baǵa berdi. Elvıra Azımova konstıtýtsııalyq baqylaý organynyń qyzmetin qamtamasyz etetin Konstıtýtsııalyq Sot Apparaty qyzmetkerleriniń edáýir bóligin de áıelder quraıtynyn atap ótti.
Onyń aıtýynsha, sot tóreligi júıesinde genderlik erekshelikke qaramastan kásibılik, obektıvtilik jáne ádildik sheshýshi mánge ıe. Kezedsý barysynda ınklıýzıvti ári ornyqty ósýdiń negizgi sharttarynyń biri retinde damý quqyǵyn qamtamasyz etýdiń halyqaralyq tásilderi talqylandy. Surya Deva Qazaqstanda júrgizilip jatqan konstıtýtsııalyq ózgeristerge joǵary baǵa berip, olardyń quqyq qorǵaý tetikterin nyǵaıtý jáne damý quqyǵyn ilgeriletý turǵysyndaǵy mańyzyn atap ótti.
BUU ókili Konstıtýtsııalyq Sotqa degen qoǵamdyq senimniń joǵary deńgeıin jáne azamattardyń konstıtýtsııalyq baqylaýdy odan ári tıimdi júzege asyrýǵa qatysty oń úmitin erekshe atap ótti.
Eske sala keteıik, buǵan deıin Konstıtýtsııalyq sot tóraǵasy Elvıra Ázimova jańa Konstıtýtsııanyń jobasy ári qaraı da qoǵamnyń kóz aldynda, ashyq talqylana beretinin aıtty.
