Konstıtýtsııalyq Sot ıadrolyq synaqtan zardap shekken halyqty áleýmettik qoldaýdy qaıta tekserýden bas tartty

ASTANA. KAZINFORM – Konstıtýtsııalyq Sotqa «Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattardy áleýmettik qorǵaý týraly» Zańnyń 13-babynyń Konstıtýtsııaǵa sáıkestigin qaraý týraly ótinish túsken.

Atalǵan bapqa sáıkes radıatsııalyq qaýipti aımaqtarda turatyn azamattardyń qosymsha eńbekaqy alýǵa jáne jyl saıyn aqysy tólenetin qosymsha demalys alýǵa quqyǵy bar.

— Ótinish berýshiniń ıadrolyq synaqtardyń saldarynan zardap shekken azamat retinde Zańda belgilengen resmı mártebesi joq. Alaıda, ol is júzinde joǵary radıatsııalyq qaýip tóngen aımaqta ómir súrip, eńbek etkendikten, daýlanyp otyrǵan normada kózdelgen áleýmettik qoldaý sharalaryna quqyǵy bar dep esepteıdi, — delingen habarlamada. 

Konstıtýtsııalyq Sot ótinish berýshige osy normanyń Konstıtýtsııaǵa sáıkestigin buryn teksergenin jáne 2023 jylǵy 25 qyrkúıektegi № 30-NQ normatıvtik qaýlysyn qabyldaǵanyn eske saldy, onda quqyqtyq ustanymdar men tekserý nátıjeleri boıynsha sheshim egjeı-tegjeıli baıandalǵan.

Konstıtýtsııalyq Sot bul normatıvtik qaýly óziniń zańdy kúshin saqtaıtynyn atap ótti.

Aıta keteıik, Konstıtýtsııalyq sot qyzmetine kiriskennen beri 400-ge jýyq qaýly qabyldady.