Konstıtýtsııalyq sot týraly zańnyń erejeleri Ata zańǵa kóshiriledi

ASTANA. KAZINFORM — Konstıtýtsııalyq reforma jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov Konstıtýtsııalyq sot týraly zańnyń erejeleri Ata zańǵa kóshiriletinin aıtty.

 — Jarııa etilgen usynystardy júzege asyrý Konstıtýtsııalyq sot týraly baptarǵa da eleýli ózgerister men tolyqtyrýlar engizýdi talap etti. Ádette Konstıtýtsııalarda Joǵary memlekettik organdardyń mártebesi men mıssııasy bekitiledi. Sondyqtan qazirgi tańda Konstıtýtsııalyq sot týraly Konstıtýtsııalyq zańda kózdelgen tıisti erejeler Ata zańǵa kóshirilip otyr, — dedi Baqyt Nurmuhanov.

Sondaı-aq, ol Konstıtýtsııalyq sot konstıtýtsııalyq baqylaý júrgizetin jáne búkil el aýmaǵynda Konstıtýtsııanyń ústemdigin qamtamasyz etetin táýelsiz memlekettik organ bolyp qala beretinin atap ótti.

— Konstıtýtsııalyq sottyń quramyna, sýdıalardyń ókilettik merzimderine jáne quzyryna qatysty normalar negizinen saqtaldy. Konstıtýtsııalyq sot qabyldaǵan sheshimderdiń quqyqtyq saldary naqty jazyldy, — dedi Konstıtýtsııalyq sot ókili.

Jalpy Konstıtýtsııalyq komıssııa otyrysynda partııalar qandaı usynys aıtqanyn myna silteme arqyly oqýǵa bolady.