Konstıtýtsııalyq Sot sýrrogat ana bolýǵa qatysty shaǵym negizinde is júrgizýden bas tartty
ASTANA. KAZINFORM — Konstıtýtsııalyq Sot azamatshanyń ótinishi boıynsha sýrrogat ana bolýdy retteıtin normalardyń Konstıtýtsııaǵa sáıkestigine qatysty máseleni qarady. Sot normalarda kemsitýshilik joq dep taýyp, sýrrogat ana ınstıtýtynyń quqyqtyq shekteýleri zań sheńberinde ekenin atap ótti. Bul týraly quzyrly organnyń baspasóz qyzmeti málim etti.
— Konstıtýtsııalyq Sotqa sýrrogat ana bolýdy retteıtin «Neke (erli-zaıyptylyq) jáne otbasy týraly» kodeksiniń 1-baby 1-tarmaǵynyń 34) jáne 35) tarmaqshalary men 59-baby 1 jáne 2-tarmaqtarynyń Konstıtýtsııaǵa sáıkestigin tekserý týraly ótinish tústi. Ótinishi jasaýǵa azamatshaǵa reprodýktologııa klınıkasynyń sýrrogat ana bolý týraly shartty jasaýǵa bas tartýy sebep boldy. Ótinish berýshiniń pikirinshe, Kodekstiń atalǵan normalary onyń ana bolý quqyǵyn shekteıdi jáne otbasylyq jaǵdaıy boıynsha kemsitýshilikke alyp keledi, — delingen habarlamada.
Konstıtýtsııalyq Sot ótinishti aldyn ala zerdeleý qorytyndysy boıynsha sýrrogat ana ınstıtýty Konstıtýtsııada bekitilmegenin jáne zańmen retteletin reprodýktıvti quqyqtardy iske asyrý nysany ekenin atap ótti. Ony qoldanýdyń ruqsat etilýi men tártibi máseleleri zań shyǵarýshynyń quzyretine jatady.
Sottyń málimetinshe, zań shyǵarýshy qoǵamdyq moral qaǵıdalaryna, balanyń múddesin qorǵaýǵa jáne teris paıdalanýdyń aldyn alýǵa negizdelgen sharttar men shekteýlerdi ornatýǵa quqyly.
— Mundaı retteý zańdylyqqa, parasattylyqqa jáne proportsıonaldylyqqa negizdelgen bolsa, Konstıtýtsııany buzbaıdy. Ótinishtiń máni sýrrogat ana ınstıtýtyna qatysty quqyqtyq retteýge ózgerister engizý týraly bolǵandyqtan, ol Konstıtýtsııalyq Sottyń quzyretine kirmeıdi. Kemsitýshilik máselesine qatysty Konstıtýtsııalyq Sot zań aldyndaǵy teńdik barlyq jaǵdaıdy birdeı retteý degendi bildirmeıdi, — dep jazdy Konstıtýtsııalyq Sot.
Aıyrmashylyqtar balalyq shaq pen otbasyn qorǵaý maqsatyn kózdegen jaǵdaıda negizdi dep tanylýy múmkin. Joǵaryda aıtylǵandarǵa súıene otyryp, Konstıtýtsııalyq Sot ótinishti konstıtýtsııalyq is-júrgizýge qabyldaýdan bas tartý týraly sheshim qabyldady.
Buǵan deıin Qazaqstandyq áıel nekesiz týǵan balaǵa alıment óndirip alý úshin Konstıtýtsııalyq sotqa júgingen bolatyn.