Konstıtýtsııalyq sot Mońǵolııa premerin otstavkaǵa jiberý týraly sheshimdi zańsyz dep tapty
ASTANA. KAZINFORM — Mońǵolııanyń Konstıtýtsııalyq soty premer-mınıstrdi otstavkaǵa jiberý týraly Parlament qaýlysyn Konstıtýtsııaǵa qaıshy dep tanydy, dep habarlaıdy Montsame.
Mońǵolııanyń Konstıtýtsııalyq soty № 08 qorytyndysyn shyǵaryp, 2025 jylǵy 17 qazanda qabyldanǵan Uly memlekettik hýraldyń № 95 qaýlysy Mońǵolııa Konstıtýtsııasynyń erejelerine qaıshy keletinin málimdedi.
Atap aıtqanda, 2025 jylǵy 22 qazanda ótken otyrysta Konstıtýtsııalyq sot Parlament tóraǵasynyń orynbasary Hýrelbaataryn Býlgantýıanyń áreketteri men Uly memlekettik hýraldyń premer-mınıstrdi qyzmetinen bosatý týraly № 95 qaýlysynyń Konstıtýtsııaǵa sáıkestigin qarady jáne tıisti qorytyndy shyǵardy.
— Qorytyndyda Hýrelbaataryn Býlgantýıa hanym Uly memlekettik hýraldyń jalpy otyrysyn basqarý kezinde Konstıtýtsııanyń 1.2 jáne 43.1 baptaryn buzǵany atap ótilgen. Parlament tóraǵasy orynbasarynyń áreketi Konstıtýtsııanyń 1.2-baby men 43.1-babynyń talaptaryna qaıshy keledi. 1.2-bapta memlekettik qyzmettiń negizgi maqsaty — demokratııany qamtamasyz etý jáne zań ústemdigin saqtaý ekeni kórsetilgen. 43.1-bapqa sáıkes, Uly memlekettik Hýral músheleriniń keminde tórtten biri premer-mınıstrdi otstavkaǵa jiberý týraly resmı usynys engizgen jaǵdaıda, Uly Hýral bul máseleni úsh kún ishinde qaraýdy bastap, on kúnniń ishinde sheshim qabyldaýy tıis. Eger barlyq múshelerdiń kópshiligi bul usynysty qoldasa, premer-mınıstrdi qyzmetinen bosatý týraly Uly memlekettik Hýraldyń qaýlysy qabyldanǵan bolyp esepteledi jáne jańa premer-mınıstr otyz kúnniń ishinde taǵaıyndalýy qajet, — delingen habarlamada.
Sondaı-aq, Uly memlekettik hýraldyń premer-mınıstrdi qyzmetinen bosatý týraly № 95 qaýlysy Konstıtýtsııanyń 1.2, 43.1 jáne 70.1 baptaryna qaıshy keletini aıtylǵan.
Konstıtýtsııanyń 70.1-babyna sáıkes, barlyq zańdar, jarlyqtar jáne memlekettik organdardyń sheshimderi, sondaı-aq uıymdar men azamattardyń qyzmeti Konstıtýtsııaǵa tolyq sáıkes kelýi tıis.
Budan buryn Mońǵolııa Uly Memlekettik Hýralynyń 17 qazandaǵy Plenarlyq otyrysynda premer-mınıstr Gombojavyn Zandanshatardy qyzmetinen bosatýǵa qatysty qaýly talqylanyp, usynys qabyldandy.