Konstıtýtsııalyq sot qyzmetine kiriskennen beri 400-ge jýyq qaýly qabyldady
ASTANA. KAZINFORM — Konstıtýtsııalyq sot qyzmetine kiriskennen beri 400-ge jýyq qaýly qabyldady. Bul týraly Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova aıtty.
— Konstıtýtsııalyq zańdylyq sapaly norma shyǵarýsyz múmkin emes. Konstıtýtsııalyq sot qyzmetine kiriskennen beri 400-ge jýyq qaýly qabyldady. Olardyń ishinde zańdar men basqa da normatıvtik quqyqtyq aktilerdiń normalaryn tekserý nátıjeleri boıynsha 72 qorytyndy sheshim quqyq-shyǵarmashylyq máselelerine qatysty. 33 normatıvtik qaýly iske asyryldy, 14-i oryndalý barysynda. Konstıtýtsııalyq baqylaý organynyń quqyqtyq ustanymdary norma shyǵarý protsesine qatysýshylardy shektemeıtinin, kerisinshe olardy quqyqtyq problemalardy derbes jáne tujyrymdamalyq turǵydan túsinýge yqpal etetinin túsiný mańyzdy, — dedi Elvıra Ázimova.
Onyń atap ótýinshe, Konstıtýtsııalyq sot ótinishterdi sol ótinishterdiń aıasynda ǵana qaraıdy. Sonymen qatar, oryndalýǵa mindetti quqyqtyq ustanymdar men sheshimderdi tujyrymdaıdy jáne olar belgilengen quqyqtyq problemalarǵa formaldy emes, tujyrymdamalyq turǵydan mán berip qaraýdy talap etedi.
— Іske asyrý merzimderin formaldy oryndaý nemese sozý quqyqtyq ekiushtylyqtyń saqtalýyna alyp kelýi múmkin. Bul zańǵa degen senimge tikeleı qaýip tóndiredi, — dedi Konstıtýtsııalyq sot tóraǵasy.
Elmıra Ázimova Konstıtýtsııalyq sottyń qorytyndy sheshimderi zańnamany jetildirý protsesine qazirdiń ózinde mynadaı áserin tıgizgenin aıtady:
— memlekettik baj normalary ońtaılandyryldy;
— kassatsııalyq qorǵalýǵa qoljetimdilik keńeıtildi;
— sýdıalardyń tártiptik kepildikteri men olardy jaýaptylyqqa tartý tártibi naqtylandy;
— bala asyrap alý, eńbek etý bostandyǵy jáne ata-analardyń áleýmettik quqyqtary qorǵaldy;
— jazalardy oryndaý, salyq salý jáne memlekettik retteý salasyndaǵy konstıtýtsııalyq emes erejeler joıyldy;
— turǵyn úıden aıyrý máselesinde Konstıtýtsııa normasyna sot sheshimine balama retindegi prokýrorlyq sanktsııaǵa jol bermeıtin resmı túsindirme berildi.
Buǵan deıin Elvıra Ázimova Konstıtýtsııalyq sotqa azamattardan jıi túsetin ótinishterdi ataǵan edi.