Konstıtýtsııalyq sot: qazaqstandyqtar muradan ishinara bas tarta almaıdy

ASTANA. KAZINFORM – Konstıtýtsııalyq sot muragerdiń muranyń bir bóliginen bas tartý quqyǵyna qatysty máseleni túsindirdi.

Konstıtýtsııalyq sotqa Azamattyq kodekstiń 1074-baby 8-bóliginiń erejelerine daý aıtý jóninde azamattan ótinish kelip tústi. Bul norma muranyń bir bóliginen bas tartýǵa, sondaı-aq eskertýlermen nemese shartpen bas tartýǵa tyıym salady.

Ótinish berýshi mundaı quqyqtyq norma onyń belgili bir múlikti, atap aıtqanda, aqshalaı salymdar men zeınetaqy jınaqtaryn alý quqyǵyn shekteıdi dep sanaıdy.

Konstıtýtsııalyq sot Konstıtýtsııanyń 26-babynyń 1-tarmaǵy azamattarǵa zańdy túrde satyp alynǵan kez kelgen múlikke jeke menshik quqyǵyna kepildik beretinin eske saldy. Sonymen qatar Joǵarǵy Sottyń normatıvtik qaýlysynyń 9-tarmaǵynda kórsetilgen quqyqtyq ustanymǵa sáıkes, muradan bas tartqan adam keıinnen óziniń bas tartýynyń kúshin joıa almaıdy nemese ony ózgerte almaıdy.

Erekshe jaǵdaılarǵa bas tartý qysym kórsetý nemese jańylysý saldarynan jasalǵan kezde - bul áreket sot tártibimen daýlanýy múmkin. Konstıtýtsııalyq sot árkimniń sot arqyly qorǵalý quqyǵyna kepildik beretinin jáne ótinish berýshi sotqa júginý arqyly osy quqyqty paıdalanǵanyn atap ótti.

Joǵaryda aıtylǵandardy eskere otyryp, Konstıtýtsııalyq sot usynylǵan dálelder konstıtýtsııalyq quqyqtardyń buzylǵanyn kórsetpeıdi degen qorytyndyǵa keldi jáne konstıtýtsııalyq is júrgizýge ótinishti qabyldaýǵa negiz joq dep tanydy.

Aıta keteıik, qazaqstandyq áıel nekesiz týǵan balaǵa alıment óndirip alý úshin Konstıtýtsııalyq sotqa júgindi.