Birqatar laýazymdy tulǵany taǵaıyndaý nemese saılaý kezinde jańa Ata Zańnyń normalary qoldanylady — Konstıtýtsııalyq sot
ASTANA. KAZINFORM — Konstıtýtsııalyq sot Memleket basshysynyń qyzmetin burynǵy qoldanysta bolǵan Ata zań boıynsha atqaryp kele jatqan Prezıdent, Konstıtýtsııalyq sot tóraǵasy, Joǵarǵy sot tóraǵasy jáne Bas prokýrordyń osy qyzmetterge jańa Konstıtýtsııanyń kúshine enýine oraı saılaný ne laýazymǵa taǵaıyndalýyn resmı túsindirý týraly ótinishine jaýap berdi.
Memleket basshysy Konstıtýtsııalyq sotqa joldaǵan ótinishinde: «laýazymyn 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes atqaryp kele jatqan adamdar 2026 jylǵy 15 naýryzdaǵy Qazaqstan Respýblıkasy Konstıtýtsııasynyń 43-baby 1-tarmaǵynda, 72-baby 2 jáne 3-tarmaqtarynda, 83-baby 1-tarmaǵynda, 84-baby 3-tarmaǵynda kórsetilgen qyzmetke saılana ala ma ne laýazymǵa taǵaıyndala ala ma?» degen suraq qoıǵan.
Konstıtýtsııalyq sot atalǵan konstıtýtsııalyq normalardyń mazmunynan olarda belgilengen shekteýler adamnyń tıisti qyzmetke aldyńǵy saılaný ne laýazymǵa aldyńǵy taǵaıyndalý faktisimen qoldanystaǵy Konstıtýtsııada jáne soǵan sáıkes qabyldanǵan normatıvtik quqyqtyq aktilerde kózdelgen tártipte ǵana baılanysty bolatyny shyǵady dep atap ótedi.
— Konstıtýtsııanyń 43-babynyń 1-tarmaǵynda, 72-babynyń 2 jáne 3-tarmaqtarynda, 83-babynyń 1-tarmaǵynda jáne 84-babynyń 3-tarmaǵynda belgilengen shekteýler qoldanylǵan jaǵdaıda 1995 jylǵy Negizgi Zań qoldanysta bolǵan kezeńde tıisti laýazymdarda bolý merzimderin, sondaı-aq qyzmetke saılaý ne laýazymǵa taǵaıyndaý faktilerin esepke alýdy kózdeıtin erejelerdi Konstıtýtsııa qamtymaıdy. Demek, adamnyń atalǵan laýazymdardyń birin 1995 jylǵy Konstıtýtsııa qoldanysta bolǵan kezeńde atqarý faktisi Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine engennen keıin ony tıisti qyzmetke saılaýǵa ne laýazymǵa taǵaıyndaýǵa Negizgi Zańda kózdelgen konstıtýtsııalyq-quqyqtyq kedergi bolyp tabylmaıdy, — dep túsindiredi Konstıtýtsııalyq sot.
Osyǵan oraı Prezıdenttiń ótinishin qaraý qorytyndysy boıynsha Konstıtýtsııalyq sot 2026 jylǵy Konstıtýtsııanyń 43-babynyń 1-tarmaǵyn, 72-babynyń 2 jáne 3-tarmaqtaryn, 83-babynyń 1-tarmaǵyn jáne 84-babynyń 3-tarmaǵyn osy konstıtýtsııalyq normalarda atalǵan laýazymdardy 1995 jylǵy Konstıtýtsııaǵa sáıkes atqaryp júrgen adamdar 2026 jylǵy Konstıtýtsııa kúshine engennen keıin tıisti qyzmetke saılanýy ne laýazymǵa taǵaıyndalýy múmkin ekenin atap ótedi. Atalǵan konstıtýtsııalyq normalarda belgilengen shekteýlerdi qoldaný maqsaty turǵysynan mundaı adamdardyń 2026 jylǵy Konstıtýtsııa kúshine engennen keıin tıisti qyzmetke saılanýy ne laýazymǵa taǵaıyndalýy alǵash ret saılaný ne taǵaıyndalý dep esepteledi.
Qujattyń tolyq nusqasymen myna siltemede tanysa alasyzdar.
Buǵan deıin qazaqstandyqtar Konstıtýtsııalyq sotqa júgingen kezde memlekettik baj tóleýden bosatylatynyn jazdyq.
