Konstıtýtsııalyq sot ákelerdiń dekrettik demalysqa shyǵý quqyǵyn zańdy dep tanydy
ASTANA. KAZINFORM — Konstıtýtsııalyq sot jumys istemeıtin ákeler úshin kishkentaı balalarǵa kútim jasaý ýaqytynyń eńbek ótiline eseptelýi týraly normany zańdy dep tanydy.

Tekserýdiń negizi – qazaqstandyq azamattyń jaǵdaıy bolǵan. Ol uly dúnıege kelgennen keıin medıtsınalyq kórsetkishter boıynsha oǵan kútim jasaý úshin jumysynan shyqqan. Alaıda zeınetaqy tólemderin esepteý kezinde onyń bul kezeńi eńbek ótiline kirmegen, sebebi Áleýmettik kodekstiń 208-baby 1-tarmaǵynyń 8-tarmaqshasy tek jumys istemeıtin analarǵa qatysty qoldanylǵan.
Máseleni qarastyrǵan sot Konstıtýtsııaǵa silteme jasap, neke men otbasy, analyq, ákelik jáne balalyq shaq memlekettiń qorǵaýynda ekenin atap ótti.
- Uly týylǵan soń eki aıdan keıin azamat medıtsınalyq qorytyndy negizinde onyń aýyr jaǵdaıyna, sondaı-aq balanyń anasy densaýlyǵyna baılanysty mundaı kútimdi júzege asyrýǵa ýaqytsha jaramsyz bolýyna baılanysty ulyna kúndelikti emdeý-qalpyna keltirý emderin kórsetý maqsatynda jumystan shyqqan. Keıinnen ótinish berýshiniń jas ulyna kútim jasaǵan ýaqyty zeınetaqy tólemderin taǵaıyndaý úshin eńbek ótilin esepteý kezinde esepke alynbaǵan. Sot Áleýmettik kodekstiń kórsetilgen normasyna silteme jasaı otyryp, talapty qanaǵattandyrýdan bas tartty, – delingen habarlamada.
Barlyq materıaldar men zańnamany zerdeleı kele, Konstıtýtsııalyq sot Konstıtýtsııaǵa sáıkes balalaryna qamqorlyq jasaý jáne olardy tárbıeleý – ata-ananyń etene quqyǵy ári mindeti, al neke men otbasy, ana men áke jáne bala memleket qorǵaýynda bolady dep kórsetti.
Qazaqstan Respýblıkasynyń azamatyna jalaqy men zeınetaqynyń eń tómen mólsherinde, jasyna baılanysty, naýqastanǵan, múgedek bolǵan, asyraýshysynan aıyrylǵan jaǵdaıda jáne ózge de zańdy negizder boıynsha áleýmettik qamsyzdandyrylýǵa kepildik beriledi.
Jas balaǵa kútim jasaý erekshe qamqorlyq men qorǵaýdy talap etedi, bular onyń qalypty fızıkalyq, aqyl-oı, adamgershilik jáne psıhologııalyq turǵydan damýy úshin qajet. Bala ómiriniń osy kezeńinde obektıvti jaǵdaılarǵa baılanysty ata-ana óziniń eńbek etý quqyǵyn iske asyrýda shektelýi múmkin.
Ata-ana mindetterin oryndaýmen negizdeletin mundaı jaǵdaılar áleýmettik qorǵaý salasyndaǵy memlekettik saıasat sheńberinde kompensatorlyq tetikterdi ázirleý kezinde eskerilýge tıis, óıtkeni Konstıtýtsııada Qazaqstan Respýblıkasy qabyldaǵan, neke men otbasyn, ana men ákeni jáne balany qorǵaýǵa kepildik beretin áleýmettik memleket modeli týraly ereje bekitiledi.
Osyǵan baılanysty Konstıtýtsııalyq sot Áleýmettik kodekste aıqyndalǵan áleýmettik qorǵaý salasyndaǵy memlekettik saıasat qaǵıdattarynyń birine – áleýmettik qorǵaý salasynda adam men azamattyń teń quqyqtylyǵy jáne olardyń quqyqtaryn shekteýge jol bermeýge nazar aýdardy.
- Tekserý nátıjeleri boıynsha Konstıtýtsııalyq Sot Kodekstiń 208-baby 1-tarmaǵynyń 8) tarmaqshasyn mynadaı túsindirmede Konstıtýtsııaǵa sáıkes keledi dep tanydy. Jumys istemeıtin ata-anaǵa jasyna baılanysty zeınetaqy tólemderin taǵaıyndaý úshin eńbek ótilin esepteý kezinde jas balalarǵa tikeleı kútimdi júzege asyrǵan ýaqyty esepke alynady, - delingen Konstıtýtsııalyq Sot habarlamasynda.