Konstıtýtsııalyq reformalar jónindegi komıssııanyń kelesi otyrysy 28 qańtarda ótedi

ASTANA. KAZINFORM — Konstıtýtsııalyq reformalar jónindegi komıssııasynyń 4-otyrysy 28 qańtarda ótedi. Bul týraly Konstıtýtsııalyq sot tóraǵasy Elvıra Ázimova aıtty. 

— Búgin sizdermen jıyntyq keste boıynsha jemisti jumys istedik. Pikir, usynys almastyq, oı bólistik. Jumys toptarynyń talqylaý qorytydylary boıynsha qosymsha usynystar tústi. Olar jıyntyq kestege engiziledi. Sonymen birge 4-otyrysta talqylaıtyn túzetýlerimizdi joba mátini túrde rásimdeýdi usynamyn. Sebebi, kesteni kórdińizder, óte úlken. Bárimizdiń de naqty jobany kórýge qyzyǵýshylyǵymyz bar. 4-otyrysymyz sársenbi — 28 qańtarda ótedi. Naqty ýaqytyn qosymsha habarlaımyz, — dedi komıssııanyń 3-otyrysyn qorytyndylanǵan Elvıra Ázimova.

Aıta keteıik, otyrysta Parlament Májilisiniń depýtaty, zań ǵylymdarynyń doktory Únzıla Shapaq Konstıtýtsııanyń preambýlasy (kirispe) jáne 33-babyna engizilgen ózgerister jóninde pikirin bildirdi. 

— Preambýla mátininde «mádenıet jáne bilim qundylyqtaryn, ǵylym men ınnovatsııa jetistikterin baǵdarǵa ala otyryp» dep jazylýy Konstıtýtsııanyń saıası-quqyqtyq jáne baǵdarlamalyq qujat ekenin dáıekteı túsedi. Osylaısha Konstıtýtsııa zańdarmen ǵana shektelmeı, bilimge, ǵylymǵa, ınnovatsııaǵa, mádenıet pen ulttyq rýhqa da baǵdar beretindeı bolýy kerek. Bilim men ǵylym — adam áleýetin damytýǵa, ınnovatsııa — tehnologııalyq táýelsizdikti qamtamasyz etýge, mádenıet pen rýh — halyqty biriktirýge qyzmet etedi, — dedi ol.