Konstıtýtsııalyq reformalar – eldiń bolashaǵyn aıqyndaıtyn túbegeıli betburys – Aıda Balaeva

ASTANA. KAZINFORM - Astanada Memleket basshysynyń bastamasymen taǵaıyndalǵan Prezıdenttik arnaýly ádebı syılyq pen «Aıboz – 2025» ulttyq ádebı syılyǵy laýreattaryn marapattaý rásimi ótti.

QR Mádenıet jáne aqparat mınıstrligi bapasóz qyzmetiniń habarlaýynsha, saltanatty is-sharaǵa QR Premer-mınıstriniń orynbasary – Mádenıet jáne aqparat mınıstri Aıda Balaeva, Parlament depýtattary, Qazaqstan Jazýshylar odaǵynyń tóraǵasy Mereke Qulkenov, sondaı-aq zııaly qaýym ókilderi qatysty.

Jeńimpazdardy quttyqtaǵan Úkimet basshysynyń orynbasary olardyń ulttyq ádebıetti damytýǵa qosqan úlesin atap ótip, qoǵamdyq sanany jańǵyrtý kezeńindegi qalamgerlerdiń aıryqsha róline toqtaldy. Sondaı-aq Memleket basshysynyń tapsyrmasyna sáıkes elde aqyn-jazýshylardy qoldaýǵa baǵyttalǵan júıeli memlekettik saıasat júzege asyrylyp jatqanyn aıtty.

Sonymen qatar Aıda Balaeva konstıtýtsııalyq reforma máselesine arnaıy toqtalyp, onda tarıhı murany saqtaý men ulttyq mádenıetti qoldaýǵa erekshe mán berilgenin atap ótti.

Onyń aıtýynsha, bul reformalar quqyqtyq keńistikti jańǵyrtýmen qatar, eldiń rýhanı negizin nyǵaıtýǵa, ulttyq qundylyqtardy zamanaýı talaptarmen úılestirýge baǵyttalǵan.

- Osy kúnderi biz tarıhı kezeńdi bastan ótkerip jatyrmyz. Memleket basshysynyń ádildik pen birtutastyqqa, zań men tártipke negizdelgen aýqymdy reformalary el damýynyń jańa baǵdaryna aınalyp otyr. Bul ózgerister qoǵamdy jan-jaqty jańǵyrtýdyń berik negizin qalyptastyrady. Memleketimizde júrip jatqan konstıtýtsııalyq reformalar – tek quqyqtyq ózgerister ǵana emes, eldiń bolashaǵyn aıqyndaıtyn, qoǵamdyq sanany jańǵyrtatyn, azamattar men memleket arasyndaǵy jaýapkershilikti arttyratyn túbegeıli betburys. Osyndaı syndarly kezeńde qoǵamnyń rýhanı baǵdaryn aıqyndaý, eldi ortaq murattarǵa uıystyrý – aıryqsha mańyzdy, – dedi Aıda Balaeva.

Sondaı-aq, Premer-mınıstrdiń orynbasary tarıhı murany saqtaý men tól mádenıetti qoldaý barshaǵa ortaq mindet ekenin, bul ustanym alǵash ret Konstıtýtsııa jobasynda naqty kórinis taýyp, mádenıet pen rýhanııat memleket damýynyń mańyzdy tirekteriniń biri retinde aıqyndalǵanyn aıtty.

-Jańa Konstıtýtsııada bilim men ǵylymǵa, mádenıet pen ınnovatsııalyq damýǵa aıryqsha basymdyq berilýi – memleketimizdiń strategııalyq ustanymyn aıqyn kórsetedi. Bul tańdaý eldiń basty kapıtaly – adam áleýetin damytýǵa, ár azamattyń bilimi men darynyn ashýǵa, progreske bastaıtyn jańa tehnologııalar men shyǵarmashylyq oıdy qoldaýǵa baǵyttalǵan. Munyń bári Qazaqstannyń uzaq merzimdi damýy tek ekonomıkalyq kórsetkishtermen emes, eń aldymen rýhanı qýaty myqty, básekege qabiletti, ozyq oıly ult qalyptastyrýmen tikeleı baılanysty ekenin taǵy da dáleldeı túsedi. Bul jaýapkershiligi zor mıssııada qalamger qaýymynyń róli erekshe. Sebebi ádebıet – qoǵam aınasy, ulttyń jan álemi, – dedi Úkimet basshysynyń orynbasary.

Aıta keterligi, bıyl Prezıdenttik arnaýly ádebı syılyqqa «Proza», «Poezııa», «Dramatýrgııa» jáne «Balalar ádebıeti» nomınatsııalary boıynsha 49 jas avtordan ótinim kelip tústi. Nátıjesinde Memleket basshysynyń Jarlyǵymen syılyq «Proza» nomınatsııasy boıynsha «Tergeýshi» shyǵarmasy úshin Arman Álmenbetke, «Poezııa» nomınatsııasy boıynsha «Qumdaǵy hıkaıa» óleńder jınaǵy úshin Saıan Esjanǵa, «Dramatýrgııa» nomınatsııasy boıynsha «Aq kıiz» dramalyq týyndysy úshin Baýyrjan Mustafıevke, «Balalar ádebıeti» nomınatsııasy boıynsha «Jazda atamnyń aýylynda…» shyǵarmasy úshin Asylan Tilegenovke tabystaldy.

Al, 2025 jyly «Aıboz» ulttyq ádebı syılyǵyna «Úzdik proza», «Úzdik poezııa», «Úzdik balalar ádebıeti», «Úzdik dramatýrgııa», «Úzdik ádebı aýdarma», «Úzdik ádebı syn» jáne «Úzdik komıks» nomınatsııalary boıynsha barlyǵy 180 ótinim qabyldandy. Baıqaý qorytyndysy boıynsha ár nomınatsııadan bir jeńimpaz anyqtaldy.

Osyǵan deıin Balaeva Konstıtýtsııanyń jańa normalary memleket pen qoǵam arasyndaǵy senimdi kúsheıtetini týraly aıtqan edi.