Konstıtýtsııalyq reformaǵa qatysty tarıhı qujattar Prezıdent Arhıvine tapsyryldy
ASTANA. KAZINFORM — Qazaqstan Respýblıkasy Prezıdenti Arhıvinde Konstıtýtsııalyq reforma jónindegi komıssııanyń qujattaryn memlekettik saqtaýǵa qabyldaý rásimi ótti.
Qujattar kesheniniń quramyna qaǵaz túrindegi qujattarmen qatar Komıssııanyń qyzmeti men konstıtýtsııalyq reformany qoǵamdyq talqylaý barysyn kórsetetin aýdıovızýaldy qujattar, onyń ishinde dybys jazbalary, tsıfrlyq fotosýretter jáne beınequjattar endi.
QR Konstıtýtsııalyq Soty Apparaty basshysynyń orynbasary Erlan Saparov QR Konstıtýtsııalyq Sotynyń Tóraǵasy Elvıra Azımovanyń arnaıy joldaǵan sózin jetkizdi.
— Bul qujattar konstıtýtsııalyq sheshimderdi izdeýdiń kúrdeli ári jaýapty úderisin, halyqaralyq tájirıbe men ulttyq memlekettik dástúrlerge súıene otyryp qabyldanǵan tańdaýlardy kórsetedi. Olardy saqtaý — óz tarıhymyzǵa, reformany júzege asyrǵan barlyq qatysýshylardyń eńbegine jáne memlekettiń tarıhı sabaqtastyǵy qaǵıdatyna degen qurmettiń kórinisi. Bul sondaı-aq Qazaqstannyń tarıhı-mádenı murasyn saqtaýǵa qosylǵan mańyzdy úles, — delingen.
Memlekettik saqtaýǵa Konstıtýtsııalyq reforma jónindegi komıssııa qyzmetin qamtıtyn qujattar kesheni tapsyryldy. Onyń ishinde otyrystardyń hattamalary men stenogrammalary, foto jáne beınematerıaldar, sondaı-aq konstıtýtsııalyq reformany qoǵamdyq talqylaý barysynda azamattar men azamattyq qoǵam ınstıtýttarynan kelip túsken 12 myń ótinish pen usynys bar.
Іs-shara barysynda sóz sóılegen Qazaqstan Respýblıkasy Prezıdenti Arhıviniń dırektory Álııa Mustafına qazirgi Qazaqstannyń memlekettik damýyndaǵy asa mańyzdy kezeńderdiń birin aıǵaqtaıtyn qujattardy memlekettik saqtaýǵa qabyldaýdyń erekshe mańyzyn atap ótti.
— Keshe ǵana Qazaqstannyń jańa Konstıtýtsııasy kúshine endi. Biz osy tarıhı sáttiń kýágerimiz. Memleket basshysy Qasym-Jomart Toqaev atap ótkendeı, elimiz úshin múlde jańa tarıhı kezeń bastaldy. Bul — maqsaty da, maǵynasy da burynǵydan ózgeshe, memleket pen qoǵamdy jan-jaqty jańǵyrtýǵa baǵyttalǵan damý joly. Prezıdent Arhıvi úshin Konstıtýtsııalyq reforma jónindegi komıssııa qujattarynyń saqtaýǵa qabyldanýy úlken mártebe ári zor jaýapkershilik. Osy qujattardyń negizinde bolashaq urpaq elimizdiń taǵdyryn aıqyndaǵan sheshimderdiń qalaı qabyldanǵanyn, konstıtýtsııalyq reformanyń qalaı ázirlenip, júzege asyrylǵanyn túpnusqa arhıvtik qujattar arqyly jan-jaqty zerdeleı alady, — dedi Álııa Mustafına.
Aıta keteıik, Komıssııa qujattary úshin arnaıy saqtandyrý qory jasaqtalady.
Qazaqstan Respýblıkasy Prezıdentiniń Arhıvi — HH–HHІ ǵasyrlardaǵy Qazaqstannyń saıası tarıhyna qatysty qujattardy saqtaıtyn eń iri ortalyq. Arhıv qorlary 1918 jyldan bergi kezeńdi qamtıdy jáne búginde 1,5 mıllıonnan astam saqtaý birligin quraıdy. Jyl saıyn Arhıv qorlary 10-15 myń jańa ispen tolyqtyrylady. Prezıdentke esep beretin memlekettik organdardan bólek, Arhıvke qujat tapsyratyn uıymdardyń qatarynda qoǵamdyq birlestikter, etnomádenı ortalyqtar, tarıhı-aǵartýshylyq uıymdar jáne kvazımemlekettik sektor kásiporyndary da bar.
Eske sala keteıik, 1 shilde kúni jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
